更多

    兔年賀年貼圖精選 有明禎女神、姜 B 幫你拜年

    Alan Ng
    Alan Ng
    《PCM》副總編輯 @Plug Media

    好快到兔年,準備好同親友拜年未呀?如果唔能夠親身去拜年,或者想同住響外國嘅親友拜年,其實只要 send 個拜年 message 比人都得嘅,今年係兔年,除咗一堆玉兔公仔,又有好多唔同 character,估唔到仲有明禎女神,幫你同親友講聲:「恭喜發財」!

    想響《WhatsApp》、《Signal》或《Telegram》加入賀年貼圖,可以去 WhatSticker 網頁搵搵,響首頁最頂揀「兔年 2023」就會見到好多兔年貼圖,當中有唔少係品牌、公司嘅推廣貼圖,亦有一啲係熱門角色嘅卡通貼圖,例如麥兜、癲噹、Squly & Friends 等等,仲有啲好貼地嘅搞笑貼圖𠻹,總有幾款啱你心水 send message 拜年用。

    不過若細心留意的話,其中有一組貼圖,名稱叫做「至兔迎春貼圖包」,咦… 睇落好熟口面喎,原來係眾男女神嘅林明禎,佢化身「女財神」做貼圖主角,由佢幫你祝賀親友「恭喜發財」、「錢兔無限」、「掂過碌蔗」、「笑口常開」、「身壯力健」;仲有另一組係「道地×林明禎 忘不了。兔迎新春」貼圖,女神扮晒兔仔講恭賀說話,收到嘅應該都咀角泛笑,分分鐘成晚瞓唔著呀!

    賀年貼圖又唔止得女神嘅,近排肥咗少少嘅姜 B 都有份㗎,呢個「鴻圖姜姜賀年版」估計係粉絲做嘅,仲有 Mirror 隊長 Lockman 都有組「CNY Lockman」貼圖,而軒公就有同銀行合作嘅新年限定 Stickers,To Nick 嘅恆仔亦有同搵樓平台合作嘅 CNY Stickers。

    要下載貼圖有少少橋妙,Android 同 iOS 都要借助「跳板」軟件先下載到,詳情可以參考返《PCM》呢篇文章;另外,WhatSticker 甚至有得自製貼圖,想比親友驚喜,跟住步驟自己整返套拜年貼圖,咪真係好似面對面咁拜年囉!

    您會感興趣的內容

    相關文章