無人機巨頭 DJI 最近啱啱出咗新嘅 FPV 無人機 AVATA 2，但又有消息將會響 4 月尾推出另一款航拍無人機，不過並唔係新機款，只可以話係升級版？但相信會引起唔少想入坑嘅初哥有興趣。
多地法例規定，只要無人機重量響 249g 以下，就毋須登記，所以 <249g 嘅無人航拍機都算頗受歡迎，較專業嘅有舊年出街嘅 Mini 4 Pro，中階嘅就有 Mini 3 系列，入門就有 Mini 2 SE，不過近日有部份地區 Amazon 嘅 DJI 專頁，有一款新機嘅預告出現咗，型號係 Mini 4K，而主題就係「The ideal 4K mini camera drone for beginners」，發佈日期係 4 月 29 號，英國夏令時間 14:00，即係香港時間同日嘅夜晚 21:00，另外，德國、美國 DJI 嘅 Amazon 專頁都見到 Mini 4K 嘅預告。
於是搵返 DJI 英國官方網頁，完全無 Mini 4K 呢部機嘅發佈預告，其他地區如香港、中國以至日本嘅亞洲區 DJI 官網都唔見 Mini 4K 嘅發佈預告。不過個預告只係得一張新機嘅相片，而呢張相片可以見到機身左臂刻有「MINI 4K」型號，細心留意的話，會發現新機同 Mini 2 SE 嘅機身係一模一樣，換句話說 Mini 4K 係 Mini 2 SE 嘅升級版，暫時所知 Mini 4K 採用咗新嘅影像處理器，可拍 4K@30fps 影片，並有 31 分鐘飛行時間，以及 10km 圖傳距離，作為入門級 <249g 嘅無人機，只要繼續維持 Mini 2 SE 個價錢，會係幾吸引嘅。
不過點解今次只係響外國嘅 DJI Amazon 專頁做預告呢？會唔會只係得部份地區先買得到呢？但有 DJI 嘅用戶早前無意中響《DJI Fly》app 發現到新機嘅踪跡，就係響配對遙控揀無人機時，竟然見到有 Mini 4K 揀，會唔會係 DJI 特登漏料，定係唔小心將 Mini 2 SE 提早轉成 Mini 4K 呢？咁就不得而知喇，唯有等多個零禮拜官方嘅正式公佈啦！
