踏入 4 月，代表 2022 年已經過咗一個季度，但係疫情持續，措施仍然繃緊，好彩確診數字近期終於回落，有望再見曙光。出書嘅今日係兒童節，各位小朋友應該好開心，因為放緊暑假嘛，可惜係無得出去玩囉，不過近排見到條街都多咗人，同時關門大吉嘅舖頭都唔少，唔知幾時先可以回覆昔日嘅好景呢！
自從兩年前起，每年嘅 4.01 除咗係愚人節、哥哥紀念日之外，亦係香港 5G 網絡正式開通嘅大日子，經過兩年光景，響疫情反覆嘅環境底下，香港 5G 嘅發展又如何呢？老實講，比起編者想像中係要好嘅，無論係網絡覆蓋、手機選擇等，可以話係進入普及嘅階段；即係咁，如果你家陣要換手機，都會優先諗換部 5G 手機啦，到約滿咪升埋上 5G 網絡，或者等唔切嘅，即刻打上台升級 5G 亦得。
當然要 5G 普及，網絡同硬件都要配合嘅，見到市面愈嚟愈多 5G 手機推出，由最初主力只係推旗艦機，到家陣中價、平價機都有 5G ，甚至連家居寬頻都有 5G Router ，可想而知 5G 嘅發展空間係有幾大喇；調返轉講，家陣手機廠商都唔會出淨 4G 嘅手機、 Dongle 、 Router 啦，係咪先！所以今期「 Cover Story 」就會同大家探討一下現時香港 5G 嘅最新狀況，最緊要係有咩抵用嘅 plan 同手機，比大家可以參考吓嘅！
編者 day1 就轉咗用 5G，搭車時會用《 moov 》嚟串流聽歌睇 MV ，配埋真無線耳機確係方便到極，咁啱呢排就試緊 CX Plus True Wireless ，貪佢嘅 Sennheiser Signature Sound 又有 ANC ，不過一路以嚟佢個專用 app 《 Smart Control 》，硬係覺得爭少少咁，終於響上個禮拜有 update 喇。
新版嘅《 Smart Control 》有個全新嘅主介面，連接咗耳機之後就會以模塊形式顯示各種功能，比以前直覺得多，另外多咗 Sound Check 同 Sound Zones 兩個新功能， Sound Check 係搵出最啱你嘅 EQ setting ，方法係用選擇題嘅方式，邊聽住歌邊揀你 prefer 嘅音色，而唔同類形嘅歌你都可以 Sound Check 一次，搞掂再 save 低，日後要聽邊類型嘅歌就搵返相關嘅 EQ 就得喇！
而 Sound Zones 就係預先設定好你成日會去嘅地方嘅 Sound Preset ，當去到嗰度好似 gym room 咁，就會自動啟用相關嘅降噪、 EQ 設定，咁就唔使次次去到都要再校一次，的確係方便嘅。不過，最令我感動嘅功能，就係響兩部裝置之間嘅切換，今次真係方便好多，因為我有一部 S21 Ultra 同 iPhone 8 Plus ，都已 pair 咗 CX Plus TW ，家陣只要響個 app 度㩒一下另一部機，等十秒八秒就會轉咗過去，用呢部聽緊歌，隔離嗰部有電話入，都可以好快 shift 過去聽電話，聽完又轉返嚟聽歌，唔使好似以前咁要手動㩒嚟㩒去，呢個功能真係超實用，讚！
