影迷近期又可以坐定定響屋企睇大片喇！事關《Disney+》響三月有多套大作開播，由樂壇天后 Taylor Swift 嘅演唱會，到已故日本傳奇漫畫大師鳥山明嘅新作，以至超級英雄嘅動畫劇集都有，總有一套啱你睇，響呢個濕𣲷𣲷嘅天氣下，開住冷氣睇好戲。
樂壇天后演唱會電影 《Taylor Swift | The Eras Tour ( Taylor’s Version ) 》
Taylor Swift 係當今樂壇天后，身為 14 項格林美獎得主嘅佢，有無數大熱歌曲，其一舉一動都大受樂迷關注，影響力甚至大到關乎經濟效益，因此出現咗 Taylornomics、Swiftonomics 專有名詞，可想而知其影響力之大。
至於 Taylor Swift 嘅巡迴演唱會門票更加係一票難求，開巡唱之地必然掀起狂熱！想一睹天后風采嘅話，啱啱響 3 月 15 日獨家上線嘅《Taylor Swift | The Eras Tour ( Taylor’s Version )》，就可以欣賞到 Taylor Swift 現場親身演出，勁歌熱舞之餘，有一 part 係 Taylor Swift 以鋼琴獨奏彈出佢其中一首最鍾意嘅歌曲《Maroon》，呢首亦係《Disney+》獨家收錄四首 unplug 版本歌曲嘅其中一首，Taylor Swift 粉絲絕對不能錯過呢套演唱會電影。
鳥山明漫畫大師改編作 《Sand Land：The Series》
日本傳奇漫畫大師鳥山明，曾創作出多部如《龍珠》、《IQ 博士》等嘅大熱作品，套套都深入民心、大受歡迎，當然亦成為無數人嘅兒時回憶。雖然大師剛去世，不過就留低咗一套全新嘅動畫劇集《Sand Land：The Series》，即將響《Disney+》獨家上線，粉絲可以睇到呢位大師嘅最新作品。
《Sand Land：The Series》由製作《機動戰士高達》及《Love Live！學園偶像計劃》嘅動畫工作室 Sunrise、創作《JoJo 的奇妙冒險》片頭嘅神風動畫，同埋專門製作高質 3DCG 動畫嘅 ANIMA 共同製作，亦有強勁嘅聲演陣容，而執導係横嶋俊久，編劇係由 Mori Hayashi 負責。
一共 13 集嘅《Sand Land：The Series》，故事延伸自 2023 年《Sand Land》動畫電影，將以電影中嘅世界為基礎，講述受人喜愛嘅惡魔王子貝爾傑布（Beelzebub）、人類保安官拉歐（Rao）以及西夫（Thief）嘅全新故事，一齊嚟迎接一場意想不到嘅奇幻冒險啦！
經典動畫風回歸 《變種特攻 ’97》
《變種特攻》係 Marvel 其中一個大受歡迎嘅系列之一，90 年代推出嘅《變種特攻》動畫劇集大受好評，「特攻迷」終於等到喇！因為《Disney+》好快會上映《變種特攻 ’97》（X-Men ‘97），新作不但延續之前嘅經典動畫風格，元老角色都確定咗會一一回歸！作為變種人嘅「變種特攻」，一直運用各種神秘嘅異能嚟保護世界，相反世人對佢哋又憎又怕，而響全新嘅動畫中，佢哋將會面臨前所未有嘅挑戰，應對各種危險任務及意想不到嘅新未來。
一連 10 集嘅《變種特攻 ’97》，有強勁嘅配音陣容大，而幕後團隊有 Beau DeMayo 擔任主編劇，Jake Castorena、Chase Conley 及 Emi Yonemura 擔任導演，The Newton Brothers 擔任音樂創作，Brad Winderbaum、奇雲費治、Louis D’Esposito、Victoria Alonso 及 DeMayo 擔任執行監製，期待度爆燈！
播映日期：3 月 20 日：傳送門
小結
除咗以上最新嘅推介之外，《Disney+ 》近期都有啲值得留意嘅電影、劇集及動漫，例如近期熱播、改編自 James Clavell 1975 年發表嘅同名小說《幕府將軍》，鍾意超級英雄嘅又有上咗無耐嘅《Marvel 隊長 2》；動漫迷就要留意嚟緊嘅4月，有多套全新日本動畫如奇幻之作《異修羅》、漫畫之神手塚治虫名作改編動畫《火之鳥：伊甸 17》、《戰隊大失格》、《龍之奇蹟》、《奇異賢伴 黑色天使》等等，大家可以睇盡各路好戲。
網址：DisneyPlus