原本 9.03 係德國 IFA 消費電子展嘅舉行大日子，可惜由於繼續受到新冠疫情影響，需要第二次取消實體展覽會喇，今年甚至無任何透過 IFA 嘅 online conf ，係真真正正消失咗一屆，不過大會就透露咗，下一年嘅 IFA 暫定將會響 2022 年嘅 9.02-06 舉行，場地照舊係響 Messe Berlin ，希望到時可以再去現場採訪啦！
雖然 IFA 2021 取消咗，不過都有 Tech 品牌響呢段時間發佈新嘢，其中 ASUS 上星期就搞咗個 online 嘅全球發布會，主題係「 Create the Uncreated 」，入面見到有幾多新品，唔少得嘅梗係一系列新筆電，包括 ProArt Studiobook 16 、 Vivobook Pro 14X/16X OLED 同埋 Zenbook 14X OLED ，睇完啲 spec 之後，感覺嚟緊嘅筆電趨勢，會係用 AMD U 同埋 OLED 芒為主，而且會係 Creator PC 夾埋 Gaming PC 嘅入門級機種主導，所以會十分適合個人 Creator 或 Gamer ，甚至係學生用戶。
而呢批 ASUS 新機， 講咗係會預裝最新嘅 Windows 作業系統， 其實 Microsoft 官方亦早響 9.01 正式宣布咗，新一代嘅 Windows 11 將會響 10.05 正式登場，所以 ASUS 呢批係首批公佈嘅 Win 11 機種嚟㗎！除咗 ASUS ，嚟緊星期三 Lenovo 都有個全球發布會，當然都會有新筆電啦，應該都會全線用 Win 11 㗎喇，除非唔係嘅啫！想知有咩新機，就記得留意《 PCM 》網站及社交平台喇！
如果今年 IFA 2021 如常舉行嘅話，又有 Win 11 ，又有新類型筆電，加埋之前 Samsung 嘅摺機，仲未計其他手機、電視機、影音嘢等等，現場睇到、摸到、玩到嘅話，你話幾好哩！
既然過咗去嘅嘢，就唔好再提喇，不如嚟個 foresee 一下啦。歐洲嘅 IFA 無奈要取消，但美國嗰邊嘅消費電子展 CES ，就話會響出年 2022.1.05-08 回復實體形式舉行，官方更公布咗有關嘅防疫安排，其中所有入場人仕都需要完成疫苗注射先得，至於最後嘅安排係點，就要等官方進一步發布喇，當然最主要都係視乎到時全球嘅疫情，最好就梗係全球疫情能夠儘快消失，所有嘢可以回復正常，真真正正全面復 show 啦！
