上次介紹過倫敦新地標 Battersea Power Station 巴特西發電廠，因為係 Apple 響英國嘅新總壇，變成果粉潮聖地，順便有得行街掃貨，不過呢度仲有個新嘅觀景台，就係由煙囪改建而成嘅 Lift 109，升上去嘅時候感覺好似玩緊 Super Mario 嘅遊戲咁呀！
有成 90 年歷史嘅 Battersea Power Station，四個角落都有一支大煙囪，而重啟工程其中之一個重點項目，就係將近 Thames River 泰晤士河南岸旁邊，稱為西北面嘅煙囪 North-west Chimney 改建成一個升降式嘅觀景台，並命名為「Lift 109」。
點解叫「Lift 109」？
「Lift 109」呢個名嘅意思都好易明，「Lift」就係升降機咁嘅全玻璃觀景台，而「109」嘅意思並唔係 109 層樓，而係當觀景台升到去煙囪最頂時嘅高度係 109m 咁解，夾埋就成為「Lift 109」喇。其實將煙囪變成觀景台已經好有噱頭，連開幕時間都夾返「109」呢一點，就係揀咗響 2022 年 11 月 15 號正式開幕，而時間就揀正 1:09pm 開始營運，即係話「Lift 109」已經營運咗 5 個多月。
筆者難得出省城倫敦玩，當然要上一上去煙囪睇吓啦，順便可以寫吓稿嘛。由於筆者屬即興去玩，問過票務處好彩即場同之後兩場都有兩人飛，如果要四個或更多人當日就無位喇；所以如果係多人去嘅話，記得響網上訂咗飛先，人少少嘅話都可以碰吓運氣，就算無即場，之後一兩場都有機會有位，shopping 完先搭「Lift 109」都仲得，但要留意即場買飛嘅價錢係比網上預訂貴啲㗎，所以最好都係 plan 定先，響網上預訂門票會更化算。
遊𨋢河前有熱身
不過記得要響預定時間前 5 分鐘到達，一來要過機檢查，二來係入場後可以響「The Gallery」了解一下 Battersea Power Station 發電廠嘅歷史同轉變，響呢度可以睇到當年嘅記錄正本，亦有啲影片展示，亦可以響中間嘅超大觸控巨芒，同其他人一齊打機，齊齊收集「能量」。
正式開始「Lift 109」之旅前，仲有個叫「The Infinity Room」嘅影像體驗室，當出面個計時器倒數完就可以入去，入面四邊幕牆會顯示 Battersea Power Station 相關嘅影像，仲會有能量粒子周圍旋轉，你用手指掂吓個幕牆仲會有反應𠻹。
上升感覺如玩 Mario
呢個觀景台嘅重點係用咗全落地玻璃設計，連頂部嘅蓋都係玻璃，咁樣升降時就可以望住煙囪口慢慢變大變細，筆者試坐嘅時候企響玻璃觀景台入面，就覺得自己好似玩緊《New Super Mario Bros.》，自己就係遊戲入面嘅 Mario 咁，響地底吸入水管升上地面嘅感覺，雖然無乜挐掕，但係筆者響升上去抬頭望住個煙囪時，腦海就只係諗到呢一幕。
當升到去煙囪最頂嘅時候，全玻璃觀景台就會凸咗出嚟，響入面嘅遊客就可以 360° 環迴欣賞倫敦及泰晤士河嘅景色，亦可以遠眺多個倫敦地標，可惜筆者搭「Lift 109」時係晏晝 16:00 幾，如果好天時上嚟睇日落就真係無得頂喇！
「Lift 109」成個過程連互動體驗大約 35-45mins，而搭升降觀景台及登頂觀景就約 20-30mins，筆者計過響最頂逗留約 8mins 左右；網上預訂票價方面，16 歲以上大人票為 £15.9，3-15 歲兒童票為 £11.5，四人家庭票（兩大兩細或一大三細）為 £50.4，十人或以上團體票每人為 £14.4，2 歲或以下嬰兒免費。
影 Magic Moment 要知
搭「Lift 109」前仲有啲嘢要留，由於「Lift 109」無衣帽間存放衣物、袋等物品，所以上去時要儘量輕便，一個背囊或斜孭袋就最好，雖然官方話要 A4 或以下大細嘅袋，但筆者試過孭個大小小嘅背囊都入得，仲有就係唔可以拉有轆嘅車仔、喼、scooter、摺車等入去，以免妨礙他人。
最後溫馨提示，如果想影到日落 Magic Moment 嘅話，家陣春夏季一定要揀星期四至日去，因為 Lift 109 嘅開放時間係有唔同，星期一至三由 10:00 開到 18:00，而星期四至日會開夜啲由 10:00 到 20:00，因為呢個時候英國日照長，19:00 幾開始日落，所以搭尾水上去先影到最正嘅 Magic Moment 㗎！
Lift 109 網址：https://lift109.co.uk/