更多

    《深淵異形》美版 4K UHD 畫質躍進

    巴頓都幾鍾意啲騎呢怪物電影,幸好呢種題材一直不乏作品,不過近十多年電腦 CG 技術進步神速,好多怪物都係用電腦特技整出嚟,雖然動作可以好神似自然,但就總係覺得欠缺啲質感,尤其係演員如果演技一般就仲大鑊,俾嘅反應唔夠真實感。

    近排有套 90 年代嘅怪物電影《深淵異形》( Tremors )出咗美版 4K UHD ,巴頓當然即刻入貨煲,呢套嘢故仔好簡單,兩位男主角準備離開一個荒蕪小鎮,但臨走前發覺有不少凶殺案出現,死狀怪異,後來先知原來地底有隻怪物搞搞震,人同動物都俾佢食咗,成個故事就講男主角們點樣帶著剩低嘅村民遊走屋頂及高處對付怪物。

    套戲雖然 Sell 恐怖動作,但其實有唔少詼諧位,加上男主角之一係 Kevin Bacon ,佢當年仲好後生,但已經有相當出色嘅演技,令成套電影生色不少。

    今次 4K 版本由導演 Ron Underwood 及攝影總監親自監督修復,質素已經有保證, 4K UHD 有 Dolby Vision 加持,清晰銳利度有著明顯提升,特別係日光場景的立體感突出,沙漠、城鎮及房屋等解像度出色,黑位亦因 HDR 而顯得更扎實。雖然地底怪物在 4K 畫面下變得好膠同假,張開大口時啲觸鬚及舌頭亦有唔少穿崩位,卻正正還原了廿多年前的特技特色,多了一份實在感!音效方面有三條,包括原聲 dts-HD 2.0 、 dts-HD 4.0 及 dts-HD 5.1 ,可惜係無 Dolby ATMOS ,不過怪物在地底出沒及爆出時的低頻份量恰當,而多場爆炸及震動都一一重現能量感,話晒呢個系列雖然出咗好多集,但最出色一定只數首集,所以儲今集已經足夠!

    您會感興趣的內容

    相關文章