最近 TNG 出新招，今次唔止喺 759 阿信屋買嘢或者畀煤氣費，而係搭的士。TNG 方面宣布同本地兩家的士車行合作，即日起推出用 App 繳付的士車費服務。
兩家車行合作車行分別為新興車行及順安車行，加埋共有 2,000 輛的士，乘客需要先入錢到 TNG 錢包，到達目的地後，掃描的士司機椅背後的 QR Code，再輸入車費及個人交易密碼便能完成交易。車費會直接轉帳到司機的銀行戶口，最遲於第二日過數，唔使經現金交易，有 App 就得，方便啲咁話。
不過，全港共有超過 18,000 架的士，而今次合作車行加埋有 2,000 架的士，可以使用 TNG 俾錢，都未必每次都俾你搭得到；現階段 TNG 為吸引司機加盟，成功登記嘅司機可獲 $100，稍後亦會有乘客優惠，但咩優惠就冇講。
