HKT 推出早前 Tap & Go「拍住賞」專用 SIM 卡，將手機變成電子錢包，不過因為要配合NFC 功能使用，只受 Android 用戶玩，未有 NFC 功能嘅 iOS 用戶只能望門興嘆。但唔緊要，因為今日起，Tap & Go 推出埋實體卡，喺所有 MasterCard Paypass 感應器上啪一啪都一樣可以畀錢，連接 iOS 手機 App 後等於 iPhone 都用到；仲不限你用咩台，就算非 csl. 及 1O1O 用戶都一樣可以用。
要申請 Tap & Go「拍住賞」，就要準備定三寶：身分證、手機電話號碼同住址證明，然後去香港電訊、csl. 及 1O1O 各專門店，入好晒資料、簽個名、驗證埋身份，就可以免費登記拎卡。張卡屬預付卡，外表同信用卡非常似，一樣有 16 位卡號碼、CVC 驗證碼、到期日同簽名欄，仲有晶片同 QR Code，但就冇卡主姓名。之後再下載專用嘅 iOS 或 Android App，就可以即時當電子錢包咁用，睇到餘額、交易紀錄、優惠 QR Code 等等。
成個登記過程都唔算耐，不過填好多個人資料，登記又填開 App又填，淨係身分證號碼都入不下三次，真係填到女版主頭都大埋。每個人憑一個身分證號碼，最多可以申請五張 Tap & Go 卡。而首次申請服務，其 Tap & Go 帳戶就可獲贈 $50；但同一身分證號碼名下第二個登記嘅號碼，就冇得送啦。
Tap & Go 其實同 MasterCard PayPass 類似，不論係 SIM 卡定實體卡，都一樣可以喺所有接受 MasterCard PayPass 嘅商戶，拍一拍讀卡器就畀到錢。畀錢嘅時候唔一定要開住手機App，亦唔需要使用數據。不過要記得，張卡有MasterCard Logo 喳，但並唔係信用卡，要先去香港電訊、csl. 及1O1O 各專門店或 7-Eleven 增值，亦可以申請用大新銀行信用卡增值，之後先可以用。
[row][double_paragraph]
[/double_paragraph][double_paragraph] 
[/double_paragraph] [/row]
下載完 Tap & Go App，首次登記時都要再輸入個人資料，同掃描卡背 QR Code 進行配對。
[row][double_paragraph]
[/double_paragraph][double_paragraph] 
[/double_paragraph] [/row]
服務主要同零售商戶合作提供優惠，例如 759 阿信屋嚟緊星期五就會有 6688 折，而 PCC 買咖啡就減 $5。
有人問，咁同八達通有乜分別呀？除咗方便 iPhone 用戶使用流動付款，Tap & Go 亦夥拍多間零售商推出優惠，包括 759 阿信屋、太平洋咖啡等等，付款時出示手機上的 QR Code，就可以獲得優惠，唔記得帶會員卡都得（不過就要帶埋 Tap & Go 卡囉）。Tap & Go 也設有「拍還拍」功能，可以透過 NFC 過數畀另一個電話號碼嘅帳戶，食完飯同 Friend 夾錢就可以唔使數神沙。另外張卡可以用嚟網上購物，概念同你去買點數卡雷同，都係預付卡；只要網購平台接受 MasterCard，就可以用嚟網購，就算你冇信用卡都可以輕鬆網購咁囉。不過Tap & Go 只接受 18 歲以上人士申請，未夠秤的話都係要諗辦法。
[row][double_paragraph]
[/double_paragraph][double_paragraph] 
[/double_paragraph] [/row]
安全性方面，用戶可以自行透過 App 密碼，保護手機錢包同交易紀錄；網上付款同實體卡功能亦可以隨時關閉，萬一唔見咗張卡，都可以立刻停止張卡嘅功能，減少損失。