「三國」一向都係個好好嘅改編題材，由電視劇、電影到電玩都有唔少關於三國嘅作品，而且好多都大受歡迎，甚至成為經典之作；最近又有一個以「三國」為背景嘅遊戲出現，而且係獲 Sega 官方授權改編嘅《三國誌大戰》，特別之處今次係一個區塊鏈遊戲，又睇吓經重新設計嘅《三國誌大戰》會係點？
《三國誌大戰》係一個卡牌遊戲，早於 2005 年 3 月首次出現響日本街機市場，以三國時代為背景嘅卡牌線上對戰遊戲，及後於多個亞洲地區面世，包括香港、台灣、澳門及新加坡，遊戲一直流行多時，甚至推出過 NDS 版本嘅《三國誌大戰 DS》，可想而知遊戲嘅受歡迎程度。
今次製作 NFT 版《三國誌大戰》嘅開發商，係來自日本嘅初創公司 double jump.tokyo，係專門提供 NFT 解決方案及區塊鏈遊戲嘅公司，曾跟多間知名公司合作，舊年 9 月獲得 Sega 授權，基於原作《三國誌大戰》呢個著名遊戲嘅基礎上，重新設計成為卡牌式策略對戰遊戲，最重要係融入 NFT 玩法，亦係 Sega 旗下首個區塊鏈遊戲，遊戲具備自動對戰元素，官方稱玩家可於 3 分鐘內建構牌組並完成自動對戰，啱晒鍾意速戰速決嘅三國 game 迷。
經過多個月嘅開發，double jump.tokyo 正式宣佈 NFT 版《三國誌大戰》暫定響 2023 年底發佈，官方網頁更釋出多個戰將嘅造型卡牌，以及一段約 1 分鐘嘅遊戲預告片，官方表示呢啲 NFT 軍閥卡牌係由知名繪師設計，其中包括街機版嘅武將，以及專門為呢個遊戲創作嘅新武將卡牌，另一方面，官方 Twitter 近日亦釋出曹操及劉備嘅獨立造型圖片，估計其他武將陸續有嚟。
另外，預告片中隱約可見到卡片佈陣嘅畫面，以及戰鬥時嘅陣式畫面，不過片中畫面仍屬開發階段，最後出街可能會有出入。遊戲初出時會有日文及英文版本，官方亦有計劃於 2024 年加入中文及韓文版本。
網站：https://lp.battle-of-three-kingdoms.games/