講就講咗兩年，USB 3.1 到呢排先至有產品賣街，暫時只得幾塊底板有該新介面，周邊流動裝置仲要再等等。SanDisk 就剛剛發布咗隻 OTG 手指，率先行 Type-C 細頭，為未來行 Type-C 嘅流動裝置做足準備。
SanDisk 新發布呢條 Dual USB Drive Type C 手指，最大賣點當然係行最新 USB Type-C 細頭，唔再分正反兩面，唔使好似 microUSB 咁驚插錯喇！隻手指另一邊就係 USB 3.0 大頭，但 SanDisk 冇公布速度，容量就只得 32GB 一款，似乎唔多夠喉喎。
不過，今次 SanDisk 真係好有先見之明，皆因暫時仲未有廠推出 Type-C 新插頭嘅智能手機或平板，呢隻手指真係出住先架咋！SanDisk 新聞稿就引用市場調查機構 Strategy Analytics 的報告，預計 2016 年將會有 12% 手機用 Type-C 插頭。你冇睇錯，下年都只係得一成幾，你話今次 SanDisk 係咪真係好有遠見呢？