家陣問你最常用嘅 IM（即時通訊）app 係邊個？相信好多讀者大大都會話 《WhatsApp》、《FB Messenger》呀咁，其實仲有好多 IM 有好多人用緊，好似《Discord》、《Google Chat》、《KaKaoTalk》、《Line》、《Telegram》、《QQ》、《Snapchat》、 《Viber》、《WeChat》等等，數落原來都有幾多，唔知大家部手機入面又裝咗幾多個呢？
無論在公在私，大家每日都會經常用 IM 同人聯絡、溝通，但大家又知唔知 IM 嘅始祖係邊個呢？對於較資深嘅電腦人嚟講，應該都會講得出《ICQ》呢個名字喇，無錯！就係 《ICQ》喇，的而且確當年《ICQ》係每部電腦必裝嘅軟件之一，佢個綠色花花 icon 亦好易認，而個介面亦成為咗家陣眾多 IM 嘅雛型。
做咩無啦啦提起《ICQ》呢？大家身邊又重有幾多人用緊呢？筆者深信家陣係無乜人用㗎喇，只不過因為響 5 月 24 號，《ICQ》官網突然公佈，話會響嚟緊嘅 6 月 26 號正式停止運作，結束 27 年半嘅 seek 人生涯。
相信好多後生仔女都未必知《ICQ》係咩？點解會叫《ICQ》？查實《ICQ》係由幾位以色列人響 1996 年 7 月成立咗一間叫 Mirabilis 嘅公司，開發咗呢個方便響電腦通訊嘅軟件《ICQ》，同年 11 月正式發佈，好快就大受歡迎，當年手機未流行，主要都係用電腦嚟通訊聯絡，連咗互聯網執行《ICQ》後，當有人用《ICQ》搵你嘅時候，就會發出「喔噢～」 嘅提示音效，從此就成為咗《ICQ》嘅標誌；而《ICQ》呢個名又係點嚟㗎呢？查實《ICQ》係「I Seek You」嘅縮寫，簡單直接就係「我搵你」，只不過唔係打大哥大、天地線、call 機，而係響電腦用個軟件，透過文字方式嚟聯繫咁解啫。
通常啲食肆都係結業先嚟大排長龍，筆者都趁今次《ICQ》最後營業，再次 login 入去懷緬一下，對上一次 login《ICQ》已經係佢出《ICQ New》手機 app 嘅時候，都係貪得意入返去睇吓仲有無 fd 玩緊，跟住都無再開過嚟用喇，今次再響手機 login 返，情況都係一樣，有個長長嘅 friend list，但全部嘅 status 都係「Seen a long time ago」，即係搵唔 到人「喔噢」啦，咁⋯⋯都正常嘅，仲點會好似當年咁，一開著部電腦就係咁唔停「喔噢～喔噢～喔噢～」，諗返起都幾搞笑。
仲有呀，家陣後生仔女興用交友 app 識人，其實《ICQ》盛行嘅年代，一樣大把男女透過《ICQ》交友，筆者身邊都有朋友係透過《ICQ》認識，最後仲結埋婚，家陣都仔大女大喇，唔知除咗係 IM 始祖，又算唔算係交友 app 始祖呢？
想回味吓《ICQ》嘅「喔噢～」提示音，只要響 Google 搜尋「icq sound」就會有好多，不過筆者就推薦一段 YouTube 影片，收錄咗 1996-2013 年所有《ICQ》嘅音效進化，成條片 14 分幾鐘不停咁播，身為初代《ICQ》用戶，聽返都幾懷念同療癒吓㗎！