用 Mouse 同 Keyboard 打 PS4 Game，係唔少玩家嘅目標；以往要咁做，就需要喺 PC 上用 Android 模擬器，但以後可能更方便，因為有開發者土製開發咗一個 Remote Play app for PC，預計今個星期內會正式公開推出。不過，專業嘅嘢唔係免費架，開發者講到明會收費，預計大約 10 美元左右。
Remote Play PC 由開發人員 Twisted 負責編寫，由 2014 年 10 月起開始一直努力到依家，終於有成果，成功將 PS4 遊戲串流到 PC 上，可以用 Keyboard 同 Mouse 當控制器打機，仲有埋片添。雖然，穩定性同延遲率都成疑，不過都已經係一大突破啦。
至於點解要收費，Twisted 就話，佢過往嘅 Apps 都係免費開放畀大眾下載，但畢竟要搵食，佢已經花咗大量時間同心機喺 Remote Play PC 呢個 App，希望大家多多支持，等佢可以全情投入開發工作，繼續增加功能，提升穩定性，同埋支援更多平台咁話。不過，始終個 App 未經官方授權，Sony 會唔會出手打壓仍然係未知之數，課金前都係睇定啲好。
來源: Twisted