出書之前一日，歐國盃啱啱完成晒所有賽事，唔知冠軍球隊又係咪讀者大大嘅愛隊呢?雖然歐國盃踢完晒喇，但嚟緊下個禮拜五又有巴黎奧運，會響 7 月 26 號正式揭幕，一連兩個多禮拜直至 8 月 11 號閉幕，完咗奧運後幾日，又到歐洲各大聯賽開咧，包括西甲、英超、意甲、法甲等等，今年真係無乜點唞過咁喎。
講開今年 Paris 2024 奧運，有朋友見啲歐洲航空公司嘅機票好鬼平，就趁奧運舉行前，特登走一轉巴黎去玩吓，據佢親身經歷，發覺奧運前嘅巴黎，周圍環境好咗、舒服咗，治安亦好咗，成個感覺完全唔同晒。
聽返啲熟路嘅朋友講（當然係一啲未經證實嘅小道消息啦！），係因為將會舉行奧運嘅關係，法國政府做咗好多嘢，所以近期巴黎市面上嘅環境乾淨咗好多，市區嘅乞兒甚至近乎絕迹，連一啲小偷扒手等都被趕盡，家陣去到巴黎，會無晒以前唔太好嘅印象，有種令人好想一去再去嘅感覺，希望呢種境況可以持續落去就好喇。
提到巴黎，Samsung 今年第二個 Galaxy Unpacked 發佈會亦係響巴黎搞，一如往年，年中 Galaxy Unpacked 發佈會嘅主角，當然係兩部旗艦級摺機 Galaxy Flip & Fold 啦！仲有新嘅 Galaxy Watch 同 Galaxy Buds 系列𠻹，嗱⋯⋯呢度唔就講咁多新機嘅嘢喇，事關編輯部都有實機試咗，想知新機嘅上手試玩報告，就去《PCM》 網站睇睇啦！
【延伸閱讀】
Samsung Galaxy Z Flip6 / Fold6 「摺」力玩盡全新 AI 功能
Samsung Galaxy Watch Ultra 專攻運動發燒友市場
結合 AI 24/7 監察你的健康 Samsung 發表 Galaxy Ring
Galaxy Z Fold6/Flip6 發售及上台詳情公布 多啦 A 夢特別版最吸睛
跟住想講講同足球有關嘅遊戲，就係筆者由 day 1 開始玩到家陣嘅《足球小將翼 夢幻隊伍》，唔經唔覺就嚟到 7 週年，當然官方有好多活動搞啦，其中最吸引嘅就係有身穿日本國家隊 2024 年奧運新波衫嘅球員比你抽，係呀！即係由大師山本 耀司特登為日本足球隊響今屆奧運設計嘅新戰衣，心口有個 Y-3 嗰件呀！
呢單嘢都係兩個禮拜前先公佈，估唔到 K-Lab 咁快做到嘢，攞咗嚟放落遊戲入面，係咪好吸引先？第一彈就有日向 小次郎、澤田 猛同埋井川 岳人，筆者抽咗 4 個 step 只得個井川 岳人，但係我好想要小次郎呀！嚟緊仲有大空 翼、若林 源三、葵新 伍、三杉 淳、松山 光⋯⋯唔通呢勻又要重課⋯⋯
