聖誕節又到，今年聖誕 Party 玩咩好？當然係搵埋一班親朋好友齊齊玩 Switch 嘅派對遊戲啦！編輯部今次精選咗多款最新嘅派對遊戲，棋盤、競技合作、音樂等各適其式，有動有靜大人細路都啱玩，買唔切實體版嘅話，部份遊戲都可以上官方 eShop 買下載版㗎！即刻睇吓今個聖誕有乜 Party Games 玩啦！
棋盤遊戲類
超級瑪利歐派對 空前盛會
《超級瑪利歐派對》系列將傳統棋盤遊戲及小遊戲結合，令本來比較靜態嘅玩法即時熱鬧起嚟，今次響 Switch 主機推出全新作品，收錄 5 個全新地圖，以及 2 個重製地圖，地圖各有鮮明主題風格外，遊玩時亦有獨特系統需要掌握，靈活運用先可以搶先攞得足夠星星勝出遊戲。遊戲另可以直接選擇遊玩過 110 款小遊戲，太多唔知點揀的話，又有每日精選幫手。
遊玩人數：1 – 4 人
售價：HK$429 按此購買
桃太郎電鐵 ～昭和 平成 令和也是定番！～ Asia Edition
日本電車鐵路文化啟蒙遊戲《桃太郎電鐵 ～昭和 平成 令和也是定番！》，終於推出支援中文的「Asia Edition」，收錄日本全國最新主要車站名字嘅棋盤遊戲，要投資車站物業以成為日本第一社長為目標，遊戲有一部遊戲機多人遊玩嘅「多人玩桃鐵」模式，或是連接多部遊戲機最多 4 人玩嘅「區域網路多人遊戲模式」。單機多人需要使用多個 Joy-con，並可選擇年度決定總回合數上限，玩家要搶先到達目標車站，會有額外獎勵及出現窮神附身，玩家要依賴卡片「趨吉避凶」或陷害對手。遊戲有很多逆轉機制，有中文字幕讓功能卡片的用途更為清楚。
遊玩人數：1-4人
售價：HK$310 按此購買
MONOPOLY 地產大亨
經典的大富翁遊戲相信大家都唔陌生，今次最新版升級棋盤及環境裝飾，玩家可挑選自己喜歡嘅骰子及棋子外觀，或創建自訂規則集來自訂《MONOPOLY 地產大亨》，同時遊戲提供不同嘅額外功能，可讓玩家規劃自己嘅遊戲體驗，包括迫使玩家改變策略嘅「快速模式」（Fast Mode），以及加快遊戲進度、縮短遊戲時間嘅「快骰」等。遊戲可以單機最多６人遊玩，並選擇所有玩家共用一個控制器，或每個玩家各用一個控制器都得，咁就唔洗準備多個 Joy-con 喇。
遊玩人數：1 – 6 人
售價：HK$228 按此購買
競技合作類
突變體忍者龜：許瑞德的復仇 – 終極版
有啲遊戲資歷嘅玩家對 1989 年 KONAMI 開發嘅街機版 4 打《Teenage Mutant Ninja Turtles》應唔陌生，呢款新作就係向佢致敬，最近推出終極版本收錄全部 DLC 內容，包括《Dimension Shellshock》帶來新嘅角色：宮本兔和卡拉，而且仲有額外更新中嘅 1987 年經典 TV 版人氣角色蒙多壁虎與蒙娜麗莎。單機在大電視玩可以最多 4 人合作，要叫朋友拎多一對 Joy-con 上嚟玩喇。
遊玩人數：1 – 4 人
售價：HK$230 下載版 / HK$278 實體版
Nintendo World Championships Famicom世界大會
《Nintendo World Championships Famicom 世界大會》收錄 13 款紅白機遊戲部分關卡內容進行競速，如《超級瑪利歐兄弟》、《薩爾達傳說》、《星之卡比》、《密特羅德》等，細分成超過 150 項競技，在各項競技中挑戰最快時間記錄。單人模式要挑戰高評級取得點數，解鎖更多其他項目，平常唔計時嘅簡單動作，都會變得緊張要求精準。單機要有足夠 Joy-con 就可以 8 人派對遊戲，回味從前嘅實體比賽。
遊玩人數：1 – 8 人
售價：HK$219 按此購買
音樂節拍類
Just Dance 舞力全開 2025
年度新作《Just Dance 舞力全開 2025》收錄 40 首火熱新歌，包括排行榜嘅熱門歌曲、派對必備嘅流行金曲、經典名曲、網路洗腦歌曲等，應有盡有，遊戲支援最多單機 6 人一齊玩，使用 Joy-con 或智能手機嘅《Just Dance 2024 控制器》app 進行體感遊玩。配合年末節慶，遊戲仲收錄咗 ５ 首聖誕歌曲應吓節。
遊玩人數：1 – 6 人
售價：HK$358 按此購買
Disney Music Parade -Encore-
原本係手機音樂遊戲，現推出完整遊戲主機版本嘅《Disney Music Parade -Encore-》，無課金煩惱之外，仲好適合小朋友玩，遊戲收錄 60 首迪士尼夢幻與冒險世界中嘅經典樂曲，又有原版動畫短片穿插。跟隨遊戲腳步收集「音樂鑰匙」解鎖新樂曲，而且單機支援最多 4 人同時遊玩，玩家能夠各自選擇 4 種不同節拍難度。此外仲有全新「搖搖模式」，玩家只要配合音樂揮動 Joy-con 即為輸入成功，不需要操作按鈕，小朋友或新手玩家都能放心遊玩！Let it go！
遊玩人數：1 – 4 人
售價：HK$429 按此購買
*試玩遊戲由任天堂（香港）提供。