「2^136,279,841-1」大家知唔知道呢個數該怎麼讀？呢個就係剛於 10 月 12 日發現嘅已知最大質數，亦係第 52 個極其罕見嘅梅森質數（梅森素數），編號 M136279841，如果以十進位寫出嚟，足足有 4,102 萬 4,320 位長，文字檔都有 41.8MB 咁大，比上一個質數足足大咗超過 1,600 萬位 😱。
呢個梅森質數係由一位前 NVIDIA 員工 Luke Durant 用由佢設計嘅雲端超級電腦基礎架構計算出嚟，呢個系統由上千粒伺服器 GPU 組成，橫跨 17 個國家 24 個數據中心區域，運行同維護國際發掘梅森質數計劃 GIMPS 嘅分析程式。
呢個系統其中一部位於愛爾蘭都柏林嘅 NVIDIA A100 GPU 報告發現 M136279841 可能係一個質數，10 月 12 日得到位於美國德州聖安東尼奧嘅 NVIDIA H100 GPU 伺服器確認。
發現呢個質數嘅同時，亦隨即更新現時已知嘅最新完全數「2^136,279,840 x (2^136,279,841-1)」，寫成十進位數足足有 8,200 萬位長，文字檔容量達 83.7MB。
雖然梅森質數並冇實質嘅直接用途，不過在發掘梅森質數嘅過程中就開發出好多新技術，包括加密運算，同時亦可以用嚟驗證電腦硬件運算係咪準確。而今次發現亦引證咗 GPU 用嚟打機同 AI 推理之外，亦好適合用於基礎數學與科學研究。
Luke 因為呢次發現獲得 3,000 美元獎金，佢計劃將獎金全數捐畀阿拉巴馬州數學與科學學院嘅數學系。
如果大家有興趣睇下呢個質素甚至背咗佢，官方亦提供呢個質數嘅文字檔畀大家挑戰下 😆
下載「M136279841」質數文字檔 ：按此