話咁快有關 iPhone 7 嘅傳聞已經逐漸流出，繼早前有消息話 Apple 會推出 4 吋細芒機種後，近日又有消息指，為咗令機身更輕薄，iPhone 7 可能會省去 3.5mm 耳機頭，你問吓咁點聽歌？幾種方法：USB-C、Lightning 或藍牙。
話說江湖傳聞，Apple 為減薄 iPhone 7 機身厚度，有意將 3.5mm 耳機口省走，只留下 2.5mm 的 USB-C 充電口，令機身再薄 1mm。Apple 分析師及創意策略總監 Tim Bajarin 認為，單從設計角度出發，Apple 未必會這樣做；但如果 Apple 能找到透過 USB-C 優化音質的方法，方案或許可行。要留意的是，坊間現時未有 3.5mm-to-USB-C adapter，如果傳聞成真的話，手機配件商就真係商機無限。至於用 Lightning 耳機，坊間係有嘅，不過並唔流行咁解。另外值得一提嘅係，Apple 都曾經嘗試過採用凹入式 3.5mm 耳機口，只支援部分耳機，後來先改用一般嘅 3.5mm 耳機口。
至於其他規格，亦有傳 iPhone 7 將會具備無線充電技術、Force Touch 感應、雙鏡頭、屏內指紋解鎖等等。Force Touch（或 3D Touch）將會進一步強化，支援兩隻手指同時操作，感應不同手指的力度。而屏內指紋解鎖則有助減省 Home 鍵，減薄邊框。傳聞有幾分真幾分假？仲要等多大半年先揭盅。
來源: Mashable, 9to5Mac