HUAWEI 下星期與 Apple 同日舉行發佈會，咁大膽當然係有原因啦！因為 HUAWEI 已經響官方微博證實咗係乜嘢新機喇，就係業界首創嘅三摺芒手機 Mate XT，仲放埋廣告片段出嚟，片段嘅主角係再次擔任代言人嘅劉德華，可想而成件事有幾「非凡」！
HUAWEI 今日（9.05）突然響官方微博中，無預警之下釋出一段片段，並輔以「三、二、一，Action！HUAWEI Mate XT | ULTIMATE DESIGN 品牌大使劉德華邀您一同見証」嘅文字說明，直接證實下星期發佈會嘅新機型號，一如傳聞就係三摺手機 Mate XT。
雖然片段中劉德華只係揸住部 Mate XT，未有見到三摺芒係點樣摺法，但就可以睇到多啲部機嘅設計，例如機背係用咗啡色嘅皮紋外殼（好大機會係真皮都唔定），除咗以金色字印有 HUAWEI 品牌外，中間更印上「ULTIMATE DESIGN」，可見 Mate XT 係 HUAWEI 嘅旗艦中嘅皇牌系列。
另外，Mate XT 嘅鏡頭模組以八角形包圍，並有四個鏡頭，補光燈以橫線正正放響中間位置，亦印有 HUAWEI 自家影像品牌「XMAGE」；而大家都好好奇嘅屏幕摺法，片段中就未有交待，但可見摺起晒啲芒後，就同一般手機一樣，而厚度似乎同現時嘅摺芒手機差唔多，片段中另一個畫面，係橫掃打開咗嘅機背，可見兩個鉸鏈係唔同嘅，推斷有鏡頭嘅一邊係向內摺，而無鏡頭嘅一邊係向外摺，咁樣摺起晒後仲可當一般手機咁用喇，不過係咪真係咁摺法，就要到發佈時先知喇。
至於好多人關心嘅價錢問題，家陣講乜都係言之尚早啦，不過可以睇吓國內嘅炒價消息，大約可以估到用戶覺得嘅合理價錢水平；截至截稿一刻，嚟自國內嘅一啲已將 Mate XT 上架嘅網上二手平台，就出現 Mate XT 嘅最高炒價已去到約 RMB40,000，換算約 HK$44,000 左右，不過好多人嘅出價都係響 RMB30,000 左右嘅水平，即係話每「摺」值一萬左右都仲可以接受，以此推算，加上現時摺機嘅售價去估計，HK$30,000 以下就算係合理嘅官方零售價喇！
只係 Mate XT 初期嘅出貨量預期未必好多，會掀起炒風亦唔出奇，難得 HUAWEI 有創新嘅手機面世，係咪「遙遙」就唔敢講，但三摺屏幕手機就絕對係「領先」業界嘅！