正當大家都等緊 DJI 嘅迷你無人機 Neo 嘅時候，HOVERAir 早已擺明車馬話會出個新嘅 X1 PRO 系列嘅新機，話口未完，HOVERAir 啱啱就官宣咗 X1 PRO 嘅發售時間及售價，估唔到咁快有得賣喎！
迷你航拍機近日成為熱話，皆因航拍機巨頭 DJI 流出新機 Neo，明打 HOVERAir X1 嘅迷你無人機市場，當 Neo 規格同影片都傳到真嘅一樣咁嘅時候，HOVERAir 官方突然殺出 X1 PRO 系列嘅消息，搞到想買機嘅朋友都好忐忑，因為兩款新機都未有確定嘅售價同推出日期，而且規格都係傳聞，齋睇網上消息真係唔知點揀好。
不過 HOVERAir 更快出招，啱啱就官宣咗 X1 PRO 系列嘅最新消息，包括售價同推出日期，仲有實拍片段比大家過目，官網啱啱更新咗，大字標題「3 days to go!」，然後就話 X1 PRO 系列會響下星期一美國時間 PDT 09:00 於 INDIEGOGO 正式發壳，即係香港時間 8 月 27 日凌晨 00:00，有心想買機嘅朋友要留意喇，因為官網話頭 48 個鐘買 Combo 組合嘅話會有 40% off，即係 6 拆喎，咁新機又賣幾錢呢？
X1 PRO 售價為 US$399 起，約 HK$3,200 左右，而 X1 PRO MAX 售價為 US$599 起，約 HK$4,700 左右，估計呢個係淨機售價，Combo 價錢會更貴，不過如果有 6 折嘅話，估計就係呢 48 個鐘內買嘅朋友，就可以用淨機價買到 Combo 喇！咁都係抵咗嘅，但要留意係運費方面，雖然官網寫明「with INDIEGOGO Shipping Guarantee」，但如果運送去香港可能需要運費都唔定，到時要睇清楚喇。
官網內仲放咗一條 1:30 鐘嘅片段出嚟，話係由 X1 PRO MAX 拍嘅，仲係用 8K 超高清解像度拍攝，影片中可見無論響山崖、雪地，8K 嘅表現都非常清晰，山脈、雪地以至景色都好細緻，而且移動拍攝時嘅前後景物層次分明，片段中又有跟拍滑雪嘅片段，響雪地高速滑行時，跟拍嘅畫面效果亦好好。睇完呢段片同知道價錢後，唔知會唔會幫大家下到決定呢？
