相信好多讀者都玩過《AR Lens》呢個 app，因為可以免費攞好多著數，只要打開《AR Lens》舉起手機捕捉相關活動嘅圖案，就可以攞到優惠、著數，所以好多人都會裝嚟玩，近日《AR Lens》就有個大更新，除咗介面靚咗之外，又睇吓有咩新功能？
《AR Lens》係香港最早用到 AR 擴增實境功能嘅 app 之一，官方近日推出咗全新 v3.0 版本，除咗介面更精美之外，功能也有提升，其中一個重點功能就係「錢包」，錢包會將收集到嘅優惠券集中響呢度，有時收集咗太多優惠券，要搵返出嚟都唔係咁容易，所以新版嘅《AR Lens》就提供「搜尋」及「篩選」功能，前者只要輸入關鍵字就可以快速搵到想要嘅優惠券，後者就會顯示商戶嘅 logo，比你揀選想要使用嘅優惠券，同時又會提醒用戶有邊啲優惠券就快到期，等你唔好錯過任何優惠。
「錢包」新功能介紹
香港電訊個人業務行政總裁林國誠稱，除咗用戶層面有提升外，新版《AR Lens》響 O2O（Online to Offline）方面亦提供更全面嘅互動效能，配合 HKT「4 網合 1」嘅優勢，日後廣告商響 Now TV 落電視廣告，就可以加埋個 QR Code 響廣告畫面度，觀眾見到個廣告後，就可以用手機即時掃瞄 QR Code，再經《AR Lens》提供產品資訊或優惠券，咁樣就可以加強觀眾嘅行動力，廣告客戶亦可得知廣告成效；另外，透過《Now TV Player》app，甚至可以按用戶喜好發放唔同廣告或優惠，大大提升行銷成效。
