呢兩個月，DJI 可謂兩面受敵，先有迷你無人機 NEO 遇著 HOVERAir X1 PRO 系列，而早兩日流出嘅 Osmo Action 5 Pro，估唔到咁快又有對手，咪就係 Action Cam 大哥 GoPro 囉，你流出新機咩，我就官宣出新機，仲要一出就出夠兩部𠻹，睇吓你點我鬥！
咁啱得咁橋，上個月（8 月）時，有網料流出 DJI 嘅迷你無人機 NEO，連 DJI 官方都未有正式公佈，就好快被同級對手 HOVERAir 搶先反擊，其中一個型號嘅規格仲勁過 NEO，睇落未出先受打擊；估唔到今次到運動相機嘅情況又係咁，早兩日又係有網料流出 Osmo Action 5 Pro 嘅消息，但再次短時間內被同樣係運動相機嘅大哥 GoPro 嚟個搶先反擊，官宣新機好快公佈，實行搶佔先機！
響 GoPro 官網可見釋出咗新機嘅預告，簡單直接咁話「2 New Cameras. Choose Your Adventure On 9/4！」，再睇埋隔離張相，有兩部 GoPro 運動相機嘅相片，雖然只係見到部份機身線條，但可見兩部新機一大一細，較大一部就同現時 HERO 12 Black 嘅機身佈區極相似，由機頂嘅拍攝鍵，到機側嘅電源 / 模式鍵及 USB-C 插頭位置都相約，估計會係新一代嘅 HERO 13 Black。
其實早於官宣前，嚟自 Igor Bogdanov（@Quadro_News）響 X（https://x.com/Quadro_News）嘅消息，漏出疑似 HERO 13 嘅相片，機面嘅設計同現時嘅 HERO 12 Black 係有少少明顯嘅分別，就係鏡頭下方換上間條紋理，另外，鏡頭又可直接換上原廠 ND Filter，同時連 Creator Edition 嘅包裝盒都有相，呢個版本亦跟咗好多配件，比創作者可以一開即用；而包裝寫住 HyperSmooth 6.0 ，即現時 HERO 12 Black 嘅防震技術相同，不過消息話新機會採用可達 177° 嘅新 Ultra-wide Lens，又會有更大 1,900mAh 嘅電池，拍 4K 或 5.3K 影片時有超過 1.5 小時嘅續航力。
至於細嗰部，由漏料可見，機身外型係一個新嘅設計，除咗縮細咗之外，亦飛走咗前芒，機面換上全間條紋理設計，左上角有一盞提示燈，至於更多規格資料就有待確定。不過 GoPro 咁耐以嚟係未試過一次過出兩個型號，今次真係學佢話齋：「有得比你揀」喇！
而兩部 HERO 13 系列新機嘅推出日期，竟然揀咗響 9.04 推出，即係比 DJI NEO 仲要早一日，睇嚟無論係迷你無人機定係運動相機，呢期 DJI 都似乎係比人睇住嚟打咁喎！不過對比返上一代 HERO 12 Black 嘅公佈日期，係 2023 年 9.06，即係話屬於 GoPro 正常一年一度嘅產品換代時間，唔似係睇住 DJI Action 5 Pro 嚟打嘅。有興趣升級嘅朋友，記得留意香港 9.04 HKT22:00，GoPro 嘅 HERO 13 系列就會正式公佈，即係過兩日就係㗎喇！