Samsung 下一部旗艦手機 S 系列已有唔少傳聞，近日網上仲流出咗一段宣染影片，製作人話係根據現時得到嘅規格傳言製作，其中最令人期待嘅應該新機會融入 Note 20 嘅風格，仲話呢個設計係 Samsung 下一代旗艦機型嘅五個原型機之一𠻹，即刻睇睇。
諗返 Galaxy Note 系列年代，當年即係 2020 年出到 Note 20 / 20 Ultra 後就停咗，跟住由 S21 系列開始，最高階嘅 S21 Ultra 就加入咗 S-Pen，亦代表 Note 系列正式榮休，但係好多 Note 粉都好懷念 Note 系列，官方 Samsung 似乎都無忘記佢咁喎，事關近日網上有傳言話，Samsung 嚟緊嘅 S 系旗艦新機，當中最高階 S25 Ultra 嘅機身設計，好有可能會重現 Note 20 嘅風格呀。
嚟自 Technizo Concept 響 X（@technizoconcept）嘅發文，佢響現有關於 S25 Ultra 嘅傳聞製作咗一段產品短片，當中可見外觀設計係幾有 Note 20 嘅感覺，不過左右兩側就改為全平面，而非 Note 20 系列嘅曲邊設計，心水清嘅粉絲應該都知，其實由 S24 Ultra 開始已用返平面芒及機背，所以呢個設計都合理嘅，至於機框四個角落就用上圓角設計，係咪熟口熟面咁呢？
影片中，S25 Ultra 屏幕四邊嘅黑位仲貼咗，相信屏佔比會進一步提高，至於按鍵、插頭、S-Pen 位置等佈局則大致相同，至於鏡頭方面，雖然都會係用返直排方式，但就唔會有一個 Note 20 獨立嘅長方形範圍包位，而係用返現時 S24 系列較為簡潔嘅獨立鏡頭設計。
S25 Ultra 傳出嘅規格會內置 Snapdragon 8 Gen 4 for Galaxy處理器，仲講到話會超越 Apple 嘅 A18 Pro 處理器𠻹，6.8” 平面屏幕會用 sAMOLED 面板，鏡頭像素最高達 200MP，而機身側面見到似乎都幾纖薄吓；不過話明係渲染影片，係真係假就拭目以待喇，現時估計 S25 系列會響 2025 年 1 月嘅 Unpacked 發佈會正式曝光。
Technizo Concept 嘅 S25 Ultra 渲染影片：