NFT 嘅發展愈嚟愈廣泛，香港亦愈嚟愈多人玩 NFT ，編輯部都有做過相關嘅題目，相信我哋嘅讀者，對 NFT 、 Blockchain 、 Bitcoin 等應該都有啲認識。講到香港有參與NFT 嘅單位，有唔少本地嘅名人或大公司都有份，比較有知名度嘅有歌手陳奐仁以 NFT 賣歌，余文樂又自創品牌嘅 NFT 等，之前海洋公園都話今年係 45 周年，所以會同 The Sandbox 合作搞吓元宇宙嘢咁話，不過細節就有待公佈喇。
而有單大壇嘢真係要講講，就係嚟自數碼及實體收藏品創作平台 FWENCLUB ，上星期三 3.16 同西班牙藝術家 Joan Cornellà 推出咗首個 NFT 系列《 MOAR by Joan Cornellà 》，備受全球注目，事關有好多各地嘅名人都會出現，係咁易數吓有:鄭志剛、 KAWS 、周杰倫、林俊傑、 Brooklyn Beckham 、 Victor Cruz 、 Verbal 、 Jeff Staple 、修杰楷、陳柏霖、吳建豪、羅志祥、秋元梢 Kozue Akimoto 、清永浩文 Hirofumi Kiyonaga 、佐野玲於 Reo Sano 、關口 Mandy Mandy Sekiguchi 、黒木啓司 Keiji Kuroki 、 Dr. Woo 、 Josh Luber 、貓貓 Kathy Zheng 、David Shrigley 、 Ryan Travis Christian 、 花井祐介、門小蕾等等，仲有一個一定要講嘅⋯⋯佢就係⋯⋯
估佢唔到嘅無厘頭始祖史提芬周⋯⋯星爺喇!大家都知神隱多年嘅星爺，一向都無社交帳戶，咁耐無露面一嚟就玩 NFT ，確實係夠晒驚喜，而且仲係走在潮流嘅尖啄，今次亦係 Joan Cornellà 向星爺嘅經典電影造型致敬推出 NFT ，而星爺嘅 NFT 造型一睇就知係嚟自電影《國產凌凌漆》入面嘅凌凌漆啦！唔只有 NFT ，星爺仲響啱啱過咗嘅星期六，響 FWENCLUB 嘅 Discord 平台玩 AMA (Ask Me Anything) ，雖然只係聽到星爺把聲，但都夠吸引一眾粉絲互相交流喇！如果星期六太多人入唔到去 join ，或者 miss 咗都唔緊要，響 YouTube 係會有重播，大家可以搵返嚟聽。如果對以上名人嘅 NFT 有 興趣，可以去 FWENCLUB 嘅《 MOAR by Joan Cornellà 》網頁睇吓，不過要留意唔係個個名人嘅NFT 都會賣㗎，好似星爺呢個凌凌漆就係非賣品，大家只係可以入去睇吓咋。
《 MOAR by Joan Cornellà 》：按此
其實 NFT 又點少得遊戲呢？二月中嘅時候，就有全港首個結合 NFT 同足球策略 GameFi 平台 HolyShxxt!! ，公開發售咗 8,888 套限量版球員 NFT ，嚟緊仲會搞一個類似 《 Football Manager 》、邊玩邊賺 (Play-to-earn) 嘅策略遊戲，響遊戲入面玩家可以選擇擔任領隊揀選出場陣容、陣式、戰術，抑或作為代理人為球員選擇合適嘅球會，跟隨領隊參賽，贏波就可以賺取平台代幣「 Key0Coin 」，之後響平台內買嘢或其他 NFT 交易。
《 HolyShxxt!! 》：按此
除咗足球 GameFi 外， 3.29 又會有一隻由本地開發嘅多人對戰遊戲《 Dark Empire 》 推出，遊戲同樣有 NFT 及元宇宙元素，加上都係 GameFi 遊戲，玩家可以邊打機邊賺錢。玩家可以響遊戲入面抽取角色、購買角色，來進行單人、團體競賽、挑戰黑暗魔獸嘅冒險等，殺敵同時亦要追求全球排名嘅榮耀； NFT 部份就係遊戲中會有獨立 NFT 寶箱，仲分為深淵、闇品及黑石三類，不同等級寶箱有不同角色及裝備，而呢個遊戲嘅 NFT 寶箱開賣一 段短時間就可以入 game ，唔使等太耐就玩得！
《 Dark Empire 》 ：按此
