HOVERAir 嘅 X1 PRO 系列近日聲勢浩大，明顯係要食咗 DJI 嘅 NEO 個勢，不過好多朋友都諗住等埋 NEO 先決定揀邊部嘅，終於 DJI 官方釋出咗 NEO 嘅推出日期，仲講到明話要「小出天際」𠻹！
等咗咁耐，DJI 響官網預告咗 NEO 嘅正式推出日期，官方已定咗響香港時間 2024 年 9 月 5 日晚上 21:00，而官網預告嘅相片中，亦見到機身側邊印有「NEO」字樣，另外，機頂見到有一排綠色提示燈，不過最吸睛嘅應該都係個主題「小出天際」，由此可見 NEO 嘅機身應該會一如傳聞咁細架喇！但就有好多本地網民攞呢個主題嚟開玩笑，睇返所有中文字嘅 DJI 網頁都係用呢個主題，而英文版嘅主題就係「The Future Takes Shape」。
雖然已經有推出日期，亦有一張機身相，但其他確實資料仍然係未知之素，不過響官宣之際，國外有 YouTuber 已經有 demo 實機攞到手，嚟自「enontheroad」頻道嘅一段約 15 分鐘嘅影片中，見到佢帶咗部 NEO 去馬來西亞，響一個海邊開箱，甚至有試飛片段，有興趣先睹為快嘅可以去下面嘅 YouTube 頻道，不過佢講嘅係意大利文，筆者就聽唔明喇，但睇畫面都夠啦。
「enontheroad」頻道：https://www.youtube.com/watch?v=6Q9nN0CoY1A