近排 DJI 焦點集中響過幾日推出嘅 NEO 迷你無人機，不過 DJI 有好多產品線，近日又流出下一代運動相機嘅相片，睇嚟 DJI 響嚟緊嘅下半年會好忙喎。
首先嚟自 Jasper Ellens | X27（@JasperEllens）響 X（https://x.com/JasperEllens）嘅消息，公開咗包括一張 Action 5 Pro 嘅實機相，以及兩張包裝盒嘅相，可見包裝盒背面印有唔少規格，其中新機係用咗新嘅 1/1.3” 感光元件，話改善咗低光表玩及成像質素，並備可拆式 f/2.8、155° 嘅鏡頭、雙 HDR-OLED 觸控屏幕、4 小時續航、Horizon Steady 防震技術及精準嘅人物居中技術，亦可連接 DJI Mic 2，仲有今次跟機有頗多配件，包括 3 粒電池、電池盒、1.5m 延長桿、兔籠、快拆轉接器等等，相信係因為走 Pro 路線，所以一次過比齊晒咁多嘢。
跟住又有嚟自 Igor Bogdanov（@Quadro_News）響 X（https://x.com/Quadro_News）嘅消息，公開咗更多有關 Action 5 Pro 疑似官方嘅相片，除咗 Action 5 Pro 嘅主機外，亦見到連接咗唔同跟機配件嘅相片，包括裝咗兔籠、可拆鏡頭、可放入 3 粒電池嘅充電盒等，從相片可見，Action 5 Pro 都係盒仔外形，無乜大轉變，但今次直接叫 Pro 而非以往嘅 Action 4，睇嚟新機響各方面都有更專業嘅表現，估計價錢方面都會幾「專業」，且拭目以待。
