呢頭個個講緊買 iPhone SE 買到斷斷哋貨，果頭網絡商竟然推出 iPhone 6s 及 iPhone 6s Plus 優惠，用指定月費計劃上台出機，同時選用埋「悅換悅新 Flexi Pass」服務，就可以提前 6 個月後提前結束舊機合約，換新手機，再另簽新約。依家上台出機一旦換機，又約疊約綁到 2046；新優惠聽落好似有所改善，睇過係咪真係咁抵先？
由即日起至5月31日推廣期內，到3香港上台出iPhone 6s及iPhone 6s Plus，再揀埋價值$28嘅「悅換悅新Flexi Pass」服務，畀埋首月費用，就可獲豁免其後最多 6 個月「悅換悅新 Flexi Pass」服務月費。呢個服務有咩特別？就係畀閣下可以喺合約期第 7-15 個月，解除舊約換新機，改簽新約；新手機預繳金額會扣除第1部手機所剩餘嘅預繳回贈。「機換機」嘅新手機會係 3 香港指定新手機，而客戶需要退回 iPhone 6s 原機先至可以換機，當然部機要「外觀良好，及性能和操作正常」等等啦。換機同時新約嘅月費計畫亦唔可以低於現有 iPhone 合約，人哋做生意計過數架。點解要畀大家 6 個月後又換新機？冇，預計 9 月 Apple「有機會」推出 iPhone 7 嘛，屈指一算，咪 6 個月後囉，潮果粉換吓機好正常丫。（不過咁誠心嘅果粉又點會仲未擁有 iPhone 6s？）
如果唔打算換機，亦可以選擇「機換 SIM」，喺合約期第 16-24 個月，退還 iPhone 6s 兼解除舊約，同時購買同等或以上數據用量及網絡速度嘅指定 SIM 月費計畫，簽足 24 個月。要機定要 SIM，自己諗諗啦，詳情可瀏覽 iphone.three.com.hk。
