講到社交平台,應該無人唔識 Facebook 啦,香港當然好多人用緊 FB,就算唔係成日用,點都會有個 account 不時 update 吓親友嘅動態,之但係又有幾多人會好好咁管理吓自己個 account 呢?其實除咗不時清吓啲無互動嘅 friend list 之外,仲可以管理吓廣告、調整吓分享偏好、分享對象,以至一啲私隱同埋安全嘅設定等等,咁樣用起上嚟先會更穩陣同有更好嘅體驗嘛。
![響限定店入面可以比你了解多啲 FB 嘅私隱、安全設定等等。](https://www.pcmarket.com.hk/wp-content/uploads/2021/12/1476-p04.jpg)
為咗比用戶可以了解多啲,FB 搞咗個 online 嘅遊戲叫《你的個人檔案,你的家居》,以打造理想家居為主題,透過互動方式幫用戶設定一個安全又個性化嘅FB account,想試玩吓嘅話可以按 呢度!
![以打造理想家居為主題嘅 online 遊戲《你的個人檔案,你的家居》,透過互動方式幫用戶設定一個安全又個性化嘅FB account。](https://www.pcmarket.com.hk/wp-content/uploads/2021/12/1476-p06.jpg)
唔止咁喎,呢幾日 FB 響中環仲搞咗個「私.家 Facebook」嘅期間限定店,呢間限定店本身係一間以餐飲生活為主題嘅概念空間,限定期間係即日起至 12 月 7 號即下個禮拜二為止,今次仲搵咗星級導師許廷鏗幫手,用戶響現場有兩樣嘢可以親身體驗嘅,首先現場有兩款互動嘅 AR 濾鏡,其中一款係 Alfred 嘅期間限定 AR 濾鏡,仲可以即場同佢虛擬合照𠻹。
![「私.家Facebook」期間限定店入面有AR濾鏡玩,仲有得同許廷鏗虛擬合照𠻹!](https://www.pcmarket.com.hk/wp-content/uploads/2021/12/1476-p02.jpg)
另一樣就係可以參加問答遊戲,測試一下自己對 FB 私隱設定嘅了解程度,答啱晒仲會有禮物㗎!靜靜雞話你知喇…每日頭 10 名得獎者係會有特別版禮物,特別之處就係份禮物有 Alfred 嘅親筆簽名喇!有興趣就趁呢兩日落去玩吓啦。
![仲可以參加問答遊戲,頭10名答啱晒嘅話會有Alfred親筆簽名嘅特別版禮物㗎!](https://www.pcmarket.com.hk/wp-content/uploads/2021/12/1476-p03.jpg)
限定店地址:Preface Coffee & Wine,中環威靈頓街 33 號 The Loop G/F