今日應該會係好多 Marvel 迷、星戰迷嘅大日子，事關 《 Disney+ 》 正式登陸香港，最少只要比 $73 月費，或者 $738 年費，就可以睇晒 Disney 、 Pixar 、 Marvel 、 Star Wars 、 National Geographic 同埋 Star （即係前 Fox 影片及亞洲電影）總共 6 條頻道，響屋企日煲夜煲心愛嘅電影同劇集喇！
響 10 月頭 《 Disney+ 》 話會嚟香港時，編者身邊已經有唔少朋友問係咪真㗎？咩價錢呀？當知道價錢之後，好多人都話會課金，尤其係 Marvel 迷，可以跟住個順序由頭再煲一次成個系列咁話喎，況且嚟緊嘅新戲、新劇都會響 《 Disney+ 》 睇到，要留意係電影會響上映後 100 日先有得睇，好似《尚氣》咁， 11.16 香港 launch 《 Disney+ 》 時就已經有得睇喇，最重要係港版睇到嘅內容暫時係同美版一樣，反而港版睇到嘅內容仲多啲𠻹，事關香港多咗條 Star 頻道係美版無嘅。
香港有 《 Disney+ 》 睇已經好開心，但唔止咁喎，響 11.12 嘅 Disney+ Day 開始，已經將 13 套 Marvel 電影升級到 IMAX 電影格式，而所用嘅 IMAX Enhanced 格式係 1:90:1 （ 1.9:1 ）畫面比例，較接近 4K 電視嘅 16:9 （ 1.77:1 ）比例，比起以往電影常用嘅 21:9 （ 2.35:1 ），新格式可以更用盡電視機嘅 16:9 畫面，令畫面上下方有多達 26% 擴展，咁就唔會再有cut頭cut尾嘅情況出現。
而今次 《 Disney+ 》 同 IMAX 合作推出 IMAX Enhanced 格式其實只係第一步，嚟緊仲會加入 IMAX Enhanced 音效格式，呢個音效格式係以 DTS:X 為基礙，不過要有兼容 IMAX Enhanced 解碼功能嘅 AV 擴音機至得，否則只會出到 DTS:X 環繞聲啫，相信影音發燒友應該會好興奮喇。
除咗粉絲之外，估唔到有好多父母好期待 《 Disney+ 》 嘅出現，有個爸爸朋友同編者講，話想 《 Disney+ 》 快啲出，到時裝咗就會即剷 Smart TV 嘅另一個串流影視 app ，事關佢話小朋友成日 loop 住嚟睇，但不時就學埋啲曳嘢返嚟，如果只係睇 《 Disney+ 》 嘅話，就唔會咁易接觸到啲曳嘢咁話，某程度上呢個講法都係成立嘅，不過編者就覺得未至於要剷 app 嘅，始終有時學習方面都會用到嘛。
編者反而對 《 Disney+ 》 出現後，會唔會影響到戲院嘅入座率呢？同事朋友間傾開呢個話題發覺都幾極端，粉絲就話一定會率先入場，唔係邊有話題喎！但唔係粉絲嘅就話唔介意等囉；但有一點肯定嘅，就係入戲院睇嘅話，無論視覺同聽覺都一定震撼好多！
最後提提大家，《 Disney+ 》 響 11.16 開台嗰晚嘅 21:00，於網上首播響香港迪士尼樂園舉行嘅盛大啟動慶典，慶祝 《 Disney+ 》 正式登陸香港！有鄭中基同埋謝安琪第一次同台對唱多首耳熟能詳嘅 Disney 主題曲，粉絲記得去 YouTube 或 Facebook 睇喇！