以往 2 月尾 3 月頭，都係好多旗艦手機發佈嘅日子，不過自從舊年受到肺炎疫情影響， MWC 無奈取消後，情況明顯有所轉變，今年繼續因疫情關係，原定3月第一個禮拜舉行嘅 MWC21 Barcelona 亦延至 6 月尾舉行，反而響上海嘅 MWC21 Shanghai 就提早響 2 月尾舉行咗一次實體展覽會，當中都有啲新品值得留意，其中一部令人幾驚喜嘅，就係 OPPO 嘅捲芒手機 X 2021 ，市場上摺芒就出現咗一段時間，仲分內摺、外摺同上下對摺嘅款式，今次 OPPO 嘅捲芒又係咩玩法呢？今期《 PCM 》雜誌內文自有分撓。
講到新品，踏入 3 月以嚟突然有好多重量級新 Gadgets 登場，而且種類各有不同，最弊係部部都好想買呢下出事吖嘛，除咗啱啱講過嘅 OPPO X 2021 外，又有傳咗好耐話會出 FPV 穿越機嘅 DJI ，終於響 3.02 成真，編者亦第一時間見過真機，亦響《 PCM 》網頁即晚出咗個開箱，可惜暫未有機會試飛，希望好快可以有機會測試一下啦，不過連日嚟響 fb 見到開始有人「炒機」，查實部機要成皮嘢都唔平，而且亦有別一般航拍機嘅玩法，各位飛手小心啲放飛喇！
講開炒機，題外話一則，上個禮拜竟然見到一段新聞，話有個女子夜晚放航拍機，不慎跌落海仲走去報警，結果就梗係… 唉…響度再呼籲玩航拍機嘅各位，記得睇清楚同熟讀民航處嘅放飛指引先好飛，唔好再做一啲唔應該嘅行為，搞到遲啲愈嚟愈多限制嘅時候，咁大家都飛得無癮咋。
有手機、有穿越機，仲有新筆電同新攝錄機，日系 VAIO 嘅旗艦級 Z 系 3D 全碳纖筆電上個禮拜都響編輯部逗留咗短短幾日，呢部機用咗 Intel 最新 10nm 嘅 11th Core 流動處理器，亦係全港第一部用咗呢粒 U 嘅筆電，勁輕之餘效能都有驚喜，係個 design 稍嫌低調咗啲啫，想知部機嘅效能表現當然係要睇內文啦；至於 Sony 緊貼日本到港嘅 FX3 ，係一部專業級嘅攝錄機，主力用嚟拍片無走雞，啱晒愈嚟愈多片同直播嘅編輯部用喇，呢部咁專業嘅攝錄機我哋都有測試喎，試完咪就係好想買囉…
最後順便響度預告一下先，嚟緊聽日同後日仲有兩樣新品會發佈，其中一樣係嚟自 Insta360 嘅，官方上個禮拜已經釋出預告片，講到明 3.09 Tue 會有「下一部相機」出現，而且仲係好細部嘅新相機嚟𠻹，想知部機細成點，就記得聽晚 22:00 留意住insta360 官方 fb @Insta360Apac 喇。另外， 3.10 Wed 就有 ASUS Mobile ，佢哋響 2 月尾事先張揚會有 ROG Phone 5 嘅新一代電競手機，有興趣嘅讀者大大記得後晚 19:00 𥄫實 ASUS Mobile HK 官方 fb @asusmobile.hk喇！當然想睇呢兩部機嘅實機同評測，就梗係要留意住《 PCM 》 fb 、網頁同下期書啦！