疫情第四波反反覆覆，好多行業都受影響，其中電影業亦是重災區，戲院唔開得，包括巴頓在內的影迷只能屈喺屋企睇電視，效果點可能同戲院比？好在近月仲有啲經典名作推出 4K 版本解一解悶，其中 1988 年的意大利電影《星光伴我心》剛推出美版 4K UHD 。
巴頓二話不說即刻入貨，事關這套經典之作感動了全球電影愛好者，尤其是近大半年戲院要停業，更令人懷念大銀幕帶來的夢想。今次 4K UHD 版本分為兩張碟， 4K 版本是 122 分鐘版本，而 Blu-ray 版就是 174 分鐘的導演版本，隨碟更附有 28 頁的小冊子，相當具珍藏價值。巴頓個人比較喜歡 122 分鐘的版本，主要原因係導演版花了太多筆墨去描繪男主角 Toto 想尋回舊情人繼續藕斷絲連嘅情節，而且亦將男主角恩師 Alfredo 拆散小情侶講得太白，令觀眾失去想像空間。 4K 版本有 Dolby Vision 加持，不過大家不要期待修復得又 Sharp 又乾淨， 4K 畫面仍有不少雜訊及微粒感，而白天場景畫質就明顯提升，對比及顏色細節都完勝以往版本，音效用上 dts-HD MA 5.1 ，雖然無咩環繞效果，但環境聲也是真實地重現，講真呢套經典之作有得出 4K 已經相當難得，所以絕對值得收藏。