剛過去嘅聖誕新年假期，唔想出街唯有留喺屋企煲劇，好在 Netflix 呢一排有唔少啱睇嘅作品上架，由於太耐無得去日本，所以一眼就揀咗《今際之國的有栖》，第一季 8 集都算好睇，係結尾有啲失控，不過都算係高水準的日劇。
雖然大家可以用手機、平板或者電腦睇到 Netflix ，然而巴頓覺得呢套日劇應該用 4K 電視機睇先過癮，首要當然係套劇本身提供咗 4K 解像度，而且劇內用特效將渋谷變成無人街景做得相當出色，充滿電影感之餘清晰度滿足到一眾影音玩家。頭四集主要場景是晚上，黑位同光影表現都有層次及深度。後四集日光場景較多，而且酒店內人人著泳衣，色彩豐富之餘又請觀眾眼睛食「冰淇淋」，最緊要當然係幾位女角都算養眼，巴頓首推「水雞」朝比奈彩，又睇得又打得，雖然外型同漫畫原著都差幾遠⋯不過觀眾睇得開心就得嘞。
另一套不容錯過嘅係《變形金剛：賽博坦大戰 地球崛起》，作為三部曲中嘅第二部，今輯觀眾會見到更多熟悉的變形金剛面孔， Dolby Vision 加持當然為畫面加分，機械人身上的金屬感更強烈，戰損及舊化效果都做得很好。雖然整套動畫色調都傾向陰暗，藉以重現垂死的賽博坦環境，但不同金剛的身體造型卻又充滿色彩，是試電視機或顯示屏顏色還原及準確度的良好素材，可惜睇完 6 集又有排等。
