編者曾在其他地方講過本地同台灣嘅 online show ，其實日本都有唔少同類演出，其中一個令編者覺得好特別嘅，就係 7 月中日本創作女歌手 Aimyon 愛繆嘅 live concert ，由於當時東京疫情都幾嚴重，原本佢 10 月舉行嘅演唱會都受影響而取消，不過愛繆就響7月頭突發舉行咗一場 “ 風とリボン ” （ 風與絲帶 ）嘅「個唱」。
當日佢如常響一個表演場地演唱，但當鏡頭 pan 到觀眾席，就會見到現場係完全無人，只得佢一個企響台上攞住結他獨彈獨唱（當然仲有工作人員啦！），雖然無現場反應、無觀眾互動、無歡呼聲，不過愛繆依然落力演出。
其實當現場有好多觀眾、粉絲時，歌手會好興奮但又會好緊張，相反企響一個無觀眾嘅台上，感覺又會係點呢？編者無咁嘅機會去感受，睇返愛繆差唔多 50 分鐘嘅演出，總共換咗兩次結他，絕無欺場求其，不過中途都唔記得咗跟住要唱邊首歌，即係話就算無觀眾在場，嗰種空洞、無反應嘅虛空感都會帶嚟另一種壓力，不過今次話晒都係第一次，網上又有咁多觀眾、粉絲睇住直播支持，最終都順利完成呢個「個唱」。
編者唔係愛繆嘅粉絲，只係間唔中聽下佢嘅歌，不過今次搞個無現場觀眾嘅 live concert ，都算好有 heart ，當然有 sponsor 係最重要嘅推力啦！可惜愛繆官方頻道已經收起咗段 live 片，想重溫嘅話可以上網試吓搵「愛繆風與絲帶」嘅。
＊ ＊ ＊
另外一個極受注目嘅，就係由椎名林檎帶領嘅東京事变今年復出，原本預定舉行嘅演唱會，當然又係因疫情而取消，不過佢哋原本預咗響 7.24 亦即係東京奧運開幕日嘅特別演出，就變成一場無觀眾嘅演唱會，佢哋唱咗20首歌，仲錄起咗現場嘅演出成為「 東京事変 2020.7.24 閏 vision 特番 ニュースフラッシュ 」，響上星期六即 9.05 晚 19:00 ， 於日本 PIA LIVE STREAM 、 ZAIKO 、 WOWOW 幾個平台直播， 今次仲開放比全世界粉絲買飛去睇， 價錢係 ¥2,222 。
唔止咁喎，除咗當晚直播之外，東京事变仲搞咗四場戲院播映呢個演唱會，分別係 9.05 、 12-14 呢四日，粉絲可以買飛響大銀幕睇，比起響屋企睇住個芒或手機當然就震撼得多啦，可惜今次香港粉絲就無得入場睇喇！
