細佬上年曾經寫過年度遊戲界回顧，上年我用「續作多伏 Game 」、「老任強勢回歸、 Indie Games 抬頭」同「多謝 EA 」嚟總結，今年簡單啲，我用「雷聲大雨點小？」嚟總結 2018 年嘅遊戲界。點解係雷聲大雨點小？因為今年其實有唔少令人期待嘅遊戲，當然今年不乏好 game，但好多都令人失望，就算唔係令人失望都有一種「哦，係咁多咋？」嘅感覺，等細佬抽啲重點嚟講啦。
Monster Hunter：World
可能你會話「吓？MHW 都有份？」。係呀，當然佢唔係伏，一出嗰陣畀人搶購，炒到五百蚊隻都有人買，最終喺 PlayStation Award 2018 破紀錄攞到四白金亦都反映 MHW 喺銷售上係好成功。但賣得好係咪就代表佢係一隻冇得彈嘅 game 呢？無疑佢係歷史上畫質最靚嘅 MH ，但留意返計埋外傳，前幾集都係出喺 3DS ，今集出喺 PS4 畫面真係好難會差過以前。雖然成個二月同三月真係差唔多人人都喺度玩 MHW ，但四月之後明顯討論度低咗好多，當然其中一個原因係好多人只係跟潮流買，根本冇考慮過隻 game 啱唔啱自己玩。但唔少玩開嘅 fans 都反映 MHW 好唔 MH ，除咗為打歐美市場而簡化咗一啲比較複雜嘅操作外，隻 game 亦因將資源放哂落去提升畫質，導致遊戲內容唔及以前豐富。再講一次，細佬唔係覺得 MHW 伏，只係似乎佢同大家嘅期望有啲落差，又或者大家本身就畀咗個唔合理嘅期望佢。不過而家同緊刺客信條合作、嚟緊又會同巫師合作， 19 年秋季仲會推出等同以往 G 級嘅 DLC Ice Borne ，相信會引到唔少人回鍋。
真三國無雙 8
《 Fallout 76 》未推出之前佢根本就係 2018 伏 game 之最，出之前標榜新系統、開放世界真係令唔少 fans 興奮。不過出到嚟居然喺舊 PS4 / PS4 Slim 大跌 frame rate ，就算 Pro 機冇呢個問題，大家都發現地圖係就係大咗，但劇情並冇隨之變得豐富，最後淪為「真．跑步無雙 8 」。題外話，成件事最搞笑係，唔用新系統居然成為咗 9 月推出嘅《無雙 OROCHI 蛇魔 3 》嘅賣點之一⋯⋯
星之卡比 新星同盟
戴返個頭盔先，我係知《星之卡比》係主打細路仔市場嘅，但都真係有啲失望。算係元老級嘅卡比積落嘅 fans 一定唔會少，作為新機第一隻卡比真係引到唔少人狗衝，雖然細佬唔係集集卡比都玩齊，但呢集真係我玩過遊戲性最低嘅一集。而家最令大家覺得伏嘅係佢個價同其他 3A 大作睇齊，就以美國定價 US$59.99 嚟講， US$59.99 你可買到 Zelda 、 Mario Odyssey 、 FIFA、 Pokémon 、大亂鬥等等，求其一隻嘅遊戲性都遠超《星之卡比 新星同盟》，但佢哋同價⋯⋯如果佢賣平返 US$20 ，我諗大家就唔會覺得佢伏。
The Quiet Man
近年開始有唔少混合真人影集嘅遊戲推出，有啲都幾受歡迎，可能因為可以當睇戲，自己又有得參與下。呢隻 game 標榜玩家玩嗰陣可以感受到自己係一個聽障人士，而且動作指導係《人中之龍》嘅濱田修一郎，期待度當然高。可惜個所謂感受到自己係一個聽障人士只係等同你打機唔開聲，但最難令人理解嘅係喺冇聲冇字幕嘅情況下，點解主角會明對方講緊乜知要做乜⋯⋯就算爆機之後嘅 New Game Plus 會加返哂啲聲落去，但似乎大家都唔太受落。不過公平啲講，原價都只係 HK$99 ，本來真係唔應該有咩期望，只係佢啲預告吹得太大，先搞到大家玩落同期望有好大落差。
Fallout 76
年度伏作！相信都唔使細佬點解釋，但最伏嘅竟然唔係隻 game ，隻 game 伏都仲可以用新 content 補救，最伏係買你個限定版，實體特典帆布袋變尼龍袋，要去到有律師行話可以幫玩家提告先跪低，但好死唔死之後個 server 無啦啦出事，搞到登記攞返帆布袋嘅玩家資料可以任人睇，你話 2019 最伏仲唔係佢！？
當然，今年都有唔少好 game 嘅，炒冷飯但實際唔多人玩過嘅《 Bayonetta 》、暗黑版 Sim City 嘅《 Frostpunk 》、攞獎攞到手軟嘅《 God of War 》、延續 Marvel 熱潮嘅《 Marvel’s Spider-man 》、令人有深切反思嘅《 Detroit: Become Human 》、記憶系統超強嘅《 Red Dead Redemption 2 》同兩隻 Indie Game 《 Celeste 》同《 Dead Cells 》。而最令細佬婉惜嘅就係《 Labo 》，其實個設計意念係幾好，可惜佢都係打破唔到大家覺得只係用幾舊水買紙皮嘅印象，特別喺香港咁潮濕的確係幾難保存，不過喺歐美地區《 Labo 》係幾受歡迎，之後應該繼續有新 Labo 嘅玩意推出。