4 月頭編者去咗高雄玩，原本想開始講吓台遊系列，不過都係留返下期先開始，因為今期好想講吓編者極度鍾意玩嘅嘢 —— 就係拑公仔機喇！
編者一路都勁鍾意玩拑公仔機，但只限去日本玩，所以以前經常去日本都會狂拑，話說最自豪嘅一次，係試過用 ¥500 3PLAY 拑塊滑板仔，即係大概一隻前臂嘅長度，真係有轆可以比個小朋友企上去滑嘅嗰啲，而我只係用咗 2PLAY 就拑咗出嚟！當然，拑咗塊滑板仔咁重又咁大塊，嘥晒個篋啲位，難免被人揶揄咗一輪，但係當我拑到出嚟嗰時，隔離啲人報以羡慕嘅眼光，同埋「嘩…」聲四起，嗰啲真係算得乜吖！話時話，雖然係好多年前嘅事，但塊滑板我仲留咗響屋企，話晒都好有記念價值㗎嘛！
不過，後來因為日元高企，所以拑公仔呢個活動已經無以前咁瘋狂，甚至最高試過十算去日本，直頭唔獲批準拑公仔𠻹！近兩年甚至少咗去日本玩（計起上嚟竟然有年半無去過東京呀！），所以斷估編者嘅拑公仔技術應該都生疏咗喇。
而拑公仔機呢樣玩意，早可以用手機嚟實現，好耐之前已經見到有拑公仔機嘅手機 Game，心諗：「嘩！開正我嗰瓣喎！」，之但係我知道真係唔可以立亂開始玩㗎，以我嘅瘋癲程度，免得一撻着就停唔到，搞到課金仲勁過買張機票去日本拑，所以就放埋一邊唔睇、唔諗、唔試、唔玩，總算叫做保得住個荷包！
直至早兩個禮拜，響真係極度異常勁無聊嘅情況下，終於……破咗戒，玩咗呢隻叫《toreba 抓樂霸》嘅拑公仔機手機 Game，查實之前已經𥄫咗好耐，因為我唔想拑啲毛公仔、Figure 呀咁，無乜心水嘢想拑，所以就遲遲無 Active 個 Acct（因為免費試拑嗰 3 次係得一個禮拜限期要用），最後見到呢個「伸縮雪糕筒」就忍唔住喇，先用咗嗰 3 次嘅免費機會試一試，當然就唔會咁易比你拑到啦！
試拑嗰陣，編者見到有啲人睇住我玩，仲跟咗隊𠻹，所以點都無理由拑拑吓益咗人㗎！於是就課咗 HK$240，計埋免費試玩嘅 3 次，總共用咗 18 次先拑到呢個「伸縮雪糕筒」，其中有 2 次因為 Lag 機搞到個拑唔知去咗邊度！實際即係大概要 16 次先拑到，如果現地拑嘅話，編者深信應該入 ¥1,000 就攞走咗（呢啲應該係 ¥1,000 5PLAY 嗰啲）！
拑完今次之後，編者都忍到手無拑落去，同埋發覺呢隻 Game 只得兩個 Cam，睇位係爭幾遠嘅，尤其係當件嘢跌埋一邊嘅時候就梗難搞；不過呢隻 Game 就有埋拑到出嚟嗰段片比返你「耀武揚威」，仲免費送貨到府上，咁又即時唔同晒喎！
拑到片段：
[ot-video][/ot-video]
