早兩日行場見到呢張騎呢卡，插 10 張 microSD 落去就可以玩合體變 SSD，有冇咁神呀？見到大家反應咁熱烈，又咁想睇張卡係咪真係咁堅（定係伏？），一於借夠 10 張卡仔同大家試試佢！
呢張「microSD×10 → 2.5″ SATA」神卡一直冇正式名，說明書上面就話叫「H1001A Adapter」，大家都係繼續叫佢做「神卡」吧啦！神卡可以插最多 10 張 microSD 卡仔，自動行 RAID 做一隻 2.5 吋 SATA SSD 咁話，標榜唔使 Driver、唔使自己 Set 就用到，完全自動波。
神卡最多可以裝 10 張 microSD，粒晶片叫 SAGE S681BG，係咪好冷門呢？SAGE 官網話呢粒 S681 只支援到 SATA2 介面，即係 3Gb/s 頻寬，大家都知係而家 SATA3（即係 6Gb/s）嘅一半啦。粒晶片最多支援 10 通道傳輸，仲勁過一般 SSD 嘅 8 通道喎！之不過，SAGE 官網亦有寫，最高讀速只去到 260MB/s，寫入就只去到 225MB/s，唔可以同主流 SSD 相提並論。
相信大家都想知，到底呢隻 SSD 係行咩 RAID 模式？實際上係冇寫嘅，因為佢當正係一般 Controller 咁運作，夾硬要講就係類似 RAID 0，各張 microSD 嘅容量加埋，又有加速效果。
到底用到幾大容量同速度？假如大家係用 10 張一模一樣嘅 microSD，說明書就聲稱提供 10 倍容量，速度都係照乘 10 倍咁話。如果啲卡嘅容量、速度唔同，就統統以最細、最慢果張為準，舉個例：用 9 張 16GB 加 1 張 2GB，都係用 2GB 去乘 10 喇！所以呢，說明書都寫明，建議用相同牌子、容量、速度嘅 microSD。
如果換走、抽走、或者死咗 10 張之中嘅卡，咁又會點？Sorry 喇，每次換卡或加減卡，神卡都會由頭計過容量同初始化，所以缺一不可！之不過，假如你將啲卡洗下牌、又識得順番次序裝番入神卡，咁仲可以拎得番所有資料。
到底 10 張 microSD 加神卡，係咪真係 SSD 呢？技術上可以答你唔係，最重要一點係張卡冇做到 Wear-Leveling 同 Over-Provisioning 兩樣 SSD 常見技術（最起碼 SAGE 官網冇提過），再加上 microSD 本身用嘅 Flash 顆粒質素唔及 SSD，長期咁用法，耐用性實在存疑。
拆解到呢度先，會盡快測試再詳報同大家報告！記得留意！
