話說今次再去 San Jose，只係隔咗兩個禮拜咁大把，響香港時差都未 Tune 返正又去過。不過今次搭嘅 Airline，係好耐無坐過嘅 UA，原本都無乜期望，點知上到機後就完全改觀，事關編者今次搭嘅 Boeing 777-300ER，咁啱係較新型號嘅 77W 型號，機上嘅設施都好新同齊備。
家陣新少少嘅飛機都會提供 USB 充電同電掣，等乘客可以叉手機、Tablet、電腦等，有啲仲提供「空中 Wi-Fi」功能，等乘客有需要嘅話，可以即時上網，初頭收費較貴非一般乘客所能負擔，但家陣已經唔再係舊時嘅天價，就好似今次編者搭嘅 UA 咁，機上嘅空中 Wi-Fi 服務一粒鐘收 US$8.99、兩粒鐘就收 US$14.99，兌返港紙大約HK$70 同 HK$120 左右，就算上足 Full flight 成程都只係 US$29.99，即係約 HK$235 度，好似編者咁由 SFO→HKG 要成 14 粒鐘，唔使 HK$250 上足成程又真係好抵吓喎！
當然空中 Wi-Fi 都有啲限制嘅，就係「Internet videostreaming is not supported」，即係唔可以串流睇片啦，而一般嘅 Email、Texting 同 Web Browsing 當然無問題，不過編者就察覺到坐後面嗰位乘客，見佢揸住個耳機嘅咪係咁細細聲講嘢，同部手機又好有交流同互動，嚴重相信佢係同人玩緊 Video Call 喇，嘩…咁咪搭住飛機都可以見多妳幾面囉！
唔單止咁，以前上咗飛機啲 Online Game 就可以一齊抖抖，家陣空中 Wi-Fi 咁抵，二百幾蚊就可以繼續打機，唔知響太平洋上空會出啲咩 Pokémon 呢？其實搭飛機都 On 住 line，真係唔知係咪好事喇！編者一於少理，瞓返覺好嘅 Tune 返個生理時鐘先！
講開 Game，上個禮拜簡直係屬於遊戲迷嘅一周，美國有 E3，日本亦有隻注目手遊 ——《キャプテン翼∼たたかえドリームチーム∼》，即係咩嚟呀？咪係《足球小將夢幻隊戰鬥》囉！因為隻 Game 係全日文介面，未必人人識玩，今期周刊就有詳細解說，等粉絲可以玩得盡興 ！
出 Game 嗰日，有等咗好耐嘅編輯部同事即刻 Download 嚟玩，但編者睇住佢哋係咁首抽成半粒鐘都無隻似樣嘅 SSR 球員，不禁陰陰咀笑咗出嚟，心諗：如果響《PCM》FB 玩 Live 直播佢哋首抽……失敗，應該都幾過癮喎∼呵呵∼
