今次去完 IO17 返嚟唔知做乜，成個禮拜都仲 Jet Lag 緊，每日到傍晚時份就勁眼瞓，但捱到半夜就眼光光，今趟時差好嚴重，希望快啲適應返啦…呀！但係下個禮拜又飛美國喎，咁即係點算好呀！
上期「論完IO」，查實仲有啲 Google 嘅嘢想講吓。嗰邊廂，Apple 新嘅總部 Apple Park 已經成形，可惜今次行程好趕未能去「監督」一下進度睇吓起成點， 不過呢邊廂，編者就經過 Google 嘅未來新總部喇， 事關響 Google Plex 行去 Mountain View 嘅 IO17 會場， 就會行經 Google Charleston East，呢度就正正係新 Google 總部嘅所在地。
話時話，呢個 Google Charleston East 總部項目都搞咗好多年，早排先獲 Mountain View 政府批准，終於可以正 式開工，仲記得舊年行過只係一片荒野，今年就已經圍晒布、動緊土喇，因為個工地都係啱啱動工個零月，所以都無乜嘢好睇㗎喇， 編者都係立此存照，如有機會再嚟，每年同一個位影一張相，咁就可以睇到 Google 新總部嘅興建進度喇嘛！
大家如有機會去參觀 GooglePlex 嘅話，不妨順便行多兩步過去睇吓啦！
講開旅行嘢，提提大家，之前咪有個號稱翻譯神器嘅即時翻譯工具嘅，只要對住佢講一句嘢，就會即刻翻譯返再講出嚟，咁樣就算去到外地，同當地人都可以流暢對談，問路、講價最適，呢隻嘢叫 ili，咁啱又係響早幾日開始 Pre-Order 喎，睇過佢啲 Demo片好似幾得咁，編者又成日呢度去嗰度去，梗係要訂返個試吓 玩吓啦，有興趣就去佢個網站訂咗先啦！
