各位 iOS 用戶今日有福啦！因為 Apple 終於放行，開放俾廣大用戶使用 WhatsApp 網頁版，唔使再葡萄 Android 嘅朋友啦。iOS 同 Android 用戶登入網頁版嘅方法大致相同，按住以下嘅步驟就可以輕輕鬆鬆用返 PC 同朋友仔傾計。
1. 如果閣下嘅 WhatsApp 未有自動顯示 WhatsApp 網頁版選項，可以先到 App Store 更新至最新的 2.12.5 版本。
2. 利用電腦的 Chrome、Firefox、Opera 或 Safari 瀏覽器，開啟 web.whatsapp.com。
3. 打開手機的 WhatsApp 應用程式，在右下角的「設定」中選擇「WhatsApp 網頁版」。
4. 此時鏡頭會自動開啟，對準電腦屏幕上的 QR Code，掃描後就會自動登入啦！
搞咗咁耐，就好似追女仔一樣，最重要係咩？給我一個選擇你的理由！依家就一次過數夠3個俾你，喂追過女仔都知，一個又點會夠？
1. 公司傾計神不知鬼不覺
用 WhatsApp 網頁版最最最大好處，就係可以一邊用電腦做野，一邊 WhatsApp，完完全全展現多工作業的最大效益。而且雙手不離鍵盤，雙眼不離屏幕，唔使將幾部裝置拎起又放低，基本上神不知鬼不覺。
2. 打字Send相更高速
相信《PCM》嘅讀者位位都精通電腦，用 Keyboard 打字又方便又順手，回應 WhatsApp 速度自然更快；而且用網頁版可以直接經電腦 Send 相，有時用相機影完相想 WhatsApp 俾人，就算相機冇 Wi-Fi 都可以直接經 micro SD 卡過相後用網頁版分享，方便得多。
3. 抬起你的頭來健康護頸
唔使頭耷耷，可以抬起頭望住個芒，你話健康護頸護脊幾簡單，仲可以加個鍵盤墊舒舒服服咁打字，唔會篤手機篤到手指都抽筋，打字速度都快啲。