早前海洋公園宣布革新基建，與香港寬頻合作提供免費無限時 Wi-Fi，工程終於完成，並同時推出升級版 App，加入展館實時導覽、預約景點通行證等功能，配合 Wi-Fi 期望提升整體遊園體驗。到底免費 Wi-Fi 同新 App 係咪令海洋公園更好玩更癲？今日女版主就入去幫大家親身試過。
 |  |
| OceanPark Free WiFi | OceanPark Free WiFi Encrypted |
 |  |
| Wi-Fi HK via OP | 全園網絡無封鎖，「甜」網都上到。 |
海洋公園上年底已公布將會夥拍香港寬頻提供免費 Wi-Fi，舖設光纖網絡及設置兩個數據中心，並設置約 400 個 Wi-Fi 熱點，同時間可支援約 4 萬部裝置。目前園內 90% 已覆蓋 Wi-Fi 網絡，到 4 月將會加入海洋列車及纜車等。
官方就話，最高傳輸率達 1Gbps。女版主就試過晒官方提供嘅3個不同網絡，包括唔需要登入密碼嘅「OceanPark Free WiFi」、免費供遊客使用但連線加密嘅「OceanPark Free WiFi Encrypted」，以及政府旗下「Wi-Fi.HK」計畫支援嘅「Wi-Fi.HK via OP」；測試結果顯示，海洋公園兩個自家網絡速度上下載都唔夠 10Mbps，政府主理嘅「Wi-Fi.HK via OP」連 5Mbps 都冇，Send 個 WhatsApp 都慢到喊出嚟。Wi-Fi 無限時亦無鎖網，連 ThisXX.com 都一樣睇到，順唔順（同點解要得閒到喺海洋公園睇）就另一回事啦。
 |  |
| 升級版 App Android 及 iOS 版均已上架。 | 實時導覽功能提供動物簡介及短片。 |
 |  |
| App 內亦有提供地圖及表演時間等資訊。 | 除了餐廳資料，App 亦提供網上訂座功能。 |
為配合免費 Wi-Fi 出爐，海洋公園都推出升級版 App，連線至公園 Wi-Fi 再開埋定位後，就可以於「海洋奇觀」、「亞洲動物天地」、「尋鯊探秘」及「四川奇珍館」四個展館內，使用實時導覽。首先用戶要先下載導覽資料，然後 App 會自動根據定位，提示用戶所在的展館位置；用戶就可以瀏覽有關的圖片、短片及文字介紹。女版主試過後就覺得，由於 App 唔識自動根據定位跳轉相應資料，下下要自己按圖索驥搵返邊條魚打邊條魚，其實都唔容易；但參觀展館時知道多少少動物保育知識，畢竟好過走馬看花式影張相就算，最有心思係短片要插上耳筒先會播放聲音，唔怕嘈親人同動物。
 |  |
| 預約景點通行證時，先連接園內 Wi-Fi，然後掃描門票後的條碼。 | 選擇預計離園時間，App 便會自動計畫行程。 |
 |  |
| 可以從 9 個景點中選擇最多3個景點預約排隊。 | 畫面會顯示預約的時間。 |
另外，App 亦加入景點預約通行證，遊客掃描入場劵上的條碼後，就可以從 9 個景點中自選 3 個景點，利用 App 排隊，並自動安排最佳遊玩時段，連諗行程都慳返；但要注意唔代表景點排隊嘅人數同時間會少咗喎，只係換個方法排隊，唔使企到腳軟。App 預計在 7 月加入自動導航功能，協助了解景點排隊時間及計畫路線；及加入海洋快證功能，以 $150 試玩價提供各景點特快通行服務。