上個禮拜《PCM》編輯完成咗搬屋、搬廠、搬寫字樓喇，正式響新Office觀塘返工，總算完成埋獨立嘅最後一個程序，一班手足亦好幫得手，既要繼續恆常嘅工作，亦要兼顧搬屋，當中解決咗好多奇離怪事，最後順利過渡，筆者響度同公司上上下下各人講聲： 辛苦晒！
而星期一新 Office 亦收到好多友好送嚟嘅花牌、果籃祝賀一番，響度筆者代表 Plug Media 仝人同咁有心意嘅各位講聲：多謝晒！
之但係筆者就未能夠親身見到咁墟冚嘅場面，事關上個禮拜筆者唔響香港，搬完 Office 第二日就去咗日本名古屋、岐阜同富山走咗轉，自駕遊揸足 6 日車，話說筆者去咗咁多次日本，都從未去過立山黑部，所以舊年就的起心肝安排好今次嘅旅程，要好好親身感受一下雪牆嘅白色震撼，順便充吓電！
立山黑部今年響 4 月 16 號正式開山，由於要返轉頭攞車，所以只係去到黑部湖就要回程，但今次終於都解咗個「成就」，加上天公造美，去到雪牆嘅最高點，總算無憾！
筆者落機嘅第一日，咁啱就係日本東京奧委會公佈咗 2020 年新嘅奧運會徽結果，話說舊年 7 月公佈嘅 2020 奧會徽疑似抄襲，雖然有關方面已否認其事，但為免招惹話柄就公開招幕新會徽，結果就由野老朝雄以「組市松紋」所設計出嘅會徽，響最後四組設計中成功勝出，「組市松紋」意思係指兩種顏色格仔花紋交替配置，而呢個新會徽就聲稱用咗日本の藍配白色格仔紋圍圈而成，所以亦被稱為「格仔徽」，有個電視節目就話係嚟自日本古代人物佐野川市松好鍾意嘅和服領紋（筆者唔識日文，如有錯漏敬請指正），唔知大家覺得點呢？點都好啦，已經塵埃落定喇， 雖然有人話單調乏味，但點都好過有抄襲之嫌啦！係咪！總之到時又有個籍口去日本咪得囉！
