上星期講完響飛機睇直播波，今次繼續講吓響飛機上嘅嘢。家陣人人手機不離手，但上到飛機就典都會有得抖抖，事關上唔到網就好多嘢做唔到，頂盡係睇戲煲劇，之不過家陣啲較新嘅飛機都有提供Wi-Fi，今次來回都係搭 Lufthansa 漢莎嘅 A350-900，當然都有啦，咁編者睇完 NBA 直播又瞓唔著，貪得意咪走去試吓個 Wi-Fi 囉！
要用機上個 Wi-Fi，就要校咗做「飛行模式」先，再開返個「Wi-Fi」，然後連上「Telekom_FlyNet」，佢就會 彈個 Portal 網頁出嚟，呢度會 Show 啲目的地資訊，好似當地時間、天氣等，只要㩒右上角粉紅色個「HOTSPOT ACCESS」掣，咁就可以揀個「HotSpot Pass Sky」，即係上網 Plan 啦！
呢個 FlyNet 有幾個 Plan 揀嘅，有 €5 嘅 FlyNet Chat、€9 上 1hr、€14 上 4hr，同埋 €17 上足成程飛機；FlyNet Chat 就顧名思義只係比你用吓啲 WhatsApp、FB Messenger 同 iMessage，等你同啲朋友文字上交流吓，其他嗰啲 Plan 就係睇時間做人啦，而且無速度同流量嘅限制，至於 Full Flight 係 Login 後可以用足 24 個鐘，就算係咁轉機應該都用唔到咁耐嘅。
揀咗 Plan 跟住開個 Account，填啲個人資料同比埋錢，咁就即刻連到 Wi-Fi 上網喇！編者驚上上吓會洽著咗，所以只係揀咗 1hr，一連咗上網之後，就即刻試 Speedtest.net，典知試咗成 20 分鐘都話「網絡通訊問題」，最後唯有放棄，可能係 FlyNet Block 咗呢個 Function 都唔定喇。
查實一連咗 Wi-Fi 之後，編者部 Note8 嘅 WhatsApp 同 FB Messenger 就係咁響，於是就一邊覆 msg，一邊試吓上網睇網頁、FB 咁啦，速度都 OK，同平時無乜大分別，不過同人傾傾吓好快就夠一粒鐘，想試吓睇片都嚟 唔切，於是用最後嘅時間試咗…《Pokémon GO》囉， 當時都唔知身處邊度嘅上空，但係睇住訓練員響度係咁 走，不時又有啲精靈捉吓，原來響飛機玩《Pokémon GO》又幾搞鬼喎！
整體嚟講，編者對呢一粒鐘嘅機上 Wi-Fi 服務都好滿意，等你響飛機嘅時間過得容易咗，但係最好唔好成程機都對住部手機喇，有緊要嘢其實可以用Notebook 上網做㗎嘛！
