港人集體回憶之一嘅荔園，相隔近 18 年，終於再強勢回歸！今年適逢荔園成立66周年，荔園有限公司宣布將於 6 月 26 日起，在中環海濱活動空間舉辦「荔園 Super Summer 2015」，免費入場，話係送畀香港人嘅一份禮物。主席邱達根仲話，如果反應良好，會考慮永久重建荔園。
雖然入場免費，不過大家仍然需要購買代幣先可以玩到場內遊戲設施，每個代幣價值港幣$10，每項遊戲需要 1-10 個代幣不等。現場亦會有限量的 Fast Pass 供即場購買，但數量及價錢未定。中環荔園佔地二萬多平方米，一齊率先睇睇十大必遊景點，諗定到時懷舊嘅最佳遊玩攻略啦！
一：荔園城堡
足足 10 米高，地標之一，設計參照原裝舊版，穿過大門就會進入奇妙世界，展開經典旅程。
二：吸蕉大笨象
未去過荔園的新一代，都可能有聽過荔園明星象 TINO。今次 TINO 由機械象扮演，可以俾大家繼續餵蕉，亦識得噴水、眨眼、發聲甚至便便。
三：滑稽恐龍屋
全新十米高的恐龍屋，單是龍尾部分的滑梯已經有五米長，小朋友見到一定好興奮。
四：魔靈小學
新版鬼屋除了保留小學的走廊、課室、洗手間等布置，仲加入 App 元素。
五：吹漲動物園
舊版荔園動物園盛極一時，新版就改用 60,000 個環保物料製成的汽球，製成數十款汽球動物，變成「吹氣動物園」，睇住先啦。
六：夏日溜冰場
荔園唔少得溜冰場，新版都有成 200 平方米，提供四款動物造型溜冰輔助器，唔識溜冰都一樣可以玩！
七：掟階磚
逢親大型嘉年華必備嘅掟階磚，重點唔係階磚，而係獎品：香口膠！
八：淘氣小木馬
另一項嘉年華必備嘅項目：旋轉木馬，中環荔園一樣有，大人細路都玩得。
九：荔園大舞台
當年嘅荔園大舞台有梅艷芳梅愛芳，以至七小福等本土巨星；今年嘅中環荔園大舞台一樣有經典好歌，仲有兒童表演、講座同工作坊。
十：好時光收集箱
「光影區」會特別展示舊日荔園嘅片段及文物，「藝術區」會有本地藝術家以香港文化為主題嘅作品，另外仲會有「Xbox One激Fun園地」，同場推出「Xbox One X 荔園別注版」主機。
 |
| 雖然入場免費，不過大家仍然需要購買代幣先可以玩到場內遊戲設施，每個代幣價值港幣$10，每項遊戲需要 1-10 個代幣不等。 |
荔園Super Summer 2015詳情：
日期：6 月 26 日至 9 月初
時間：上午 11 時至下午 11 時
地點：中環海濱活動空間
收費：免費入場，參與遊戲須另購代幣，每個代幣 $10