啲網絡保安專家話，要安全就唔好所有 Account 用晒同一組密碼，密碼組合仲要有數字有大小楷英文又有符號，之但係大頭蝦人士要記一組長密碼已經夠痛苦，邊記到咁多嘢呢？Google 大神就幫到手：唔用密碼登入咪得囉。
 |  |
 |  |
話說有網民就獲得 Google 神召，測試新嘅登入系統，登入 Google 帳戶時，只需要輸入電郵地址，唔使輸入密碼；然後系統會 Send 一封通知訊息到閣下手機，確認你係咪喺電腦登入，然後選擇返電腦屏幕上顯示嘅數字。當然，如果手機唔喺手邊，你都可以隨時用返密碼去登入。
雖然唔使輸入密碼，不過登入程序就同平時網上銀行用嘅雙重身份認證類似，需要閣下經手機再確認，先可以登入。唔使輸入密碼除咗方便大頭蝦者記少樣嘢打少幾隻字，亦可以防止網絡釣魚導致密碼外洩。一旦手機遺失或被盜，都可以用另一部裝置登入帳戶，然後喺裝置活動管理中移除遺失裝置的帳戶存取權。呢套免密碼登入法暫時都仲係測試階段，只有被選中嘅小孩先有份試用，亦未知幾時會正式推出，大家想用都唯有等下先～
來源：Reddit