女版主嘅朋友T係靚女一名，自願從軍入伍之士排到過海，最近 T 就諗住去韓國旅行喎，仲興致勃勃咁上 YouTube 自學韓文。問曰：「咁你學識叫人幫手揸機影相韓文點講未呀？」答曰：「洗乜呀，用自拍神棍咪得囉。」「吓點解唔請人幫手揸機影呀？」「我覺得自己影先會影得自己靚啲囉。」娘娘永遠是對的。
下下拎住枝自拍神棍去旅行，又真係幾重幾麻煩嘅。有見之士最近就喺 Kickstarter 上推出一項新產品：自拍神棍 iPhone 殼「STIKBOX」。呢個殼外表同一般 iPhone 殼差不多，厚 17mm，不過殼嘅背面就暗藏八節伸縮鋁製自拍神棍，拉出嚟就可以隨時變 28.3 吋長嘅神棍。個殼共重 130g，神棍嚟講就唔算重，當個手機殼就……
不過 STICKBOX 都只係賣 19 蚊美金一個，折合約港幣 $147，有殼有棍，iPhone 6 及 6s 適用；6 Plus / 6s Plus 版就賣 29 蚊美金（約港幣 $225），有七種顏色選擇，預計五月出貨，難怪短短三日已經有超過 270 人支持呢個項目。咁會唔會出 Android 版呀？研究團隊話暫時仲係專注喺 iPhone，不過未來都希望會推出 Android 咁話。