去旅行嘅時候，每次要打電話畀 Front Desk，都好似重新經歷緊會考英文 Oral 考試咁，會臉紅心跳流汗，「Hello from the other side～」但講足十分鐘，櫃檯姐姐先知你只係想要多枝牙刷。美國酒店 Aloft Hotels 就善用科技，推出 emoji 客房服務，想叫 Room Service？Send 個 emoji 畀櫃檯姐姐就得。
Aloft Hotels 率先在紐約曼克頓嘅 Aloft Manhattan Downtown 推出 emoji Room Service 服務，未來會擴至旗下歐洲及亞洲的其他酒店。Emoji room service 提供 6 項服務，包括地鐵卡及地圖、牙刷牙膏及剃刀（如果閣下有去過美國旅行可能會知道，大美帝國嘅酒店係唔興提供牙刷牙膏等物品嘅）、止痛藥連兩枝維他命水同香蕉（話醒酒用喎）、零食、電話充電器，以及神秘禮品（據指有太陽眼鏡、扭計骰等等）。收費方面由 10 蚊至 30 蚊美金不等，一啲都唔平，不過酒店 Room Service 仲要唔使閣下開金口，Send 個訊息講埋邊間房，就有專人直送到房門，係有啲代價嘅。除非閣下英文好似 Tree Gun 博士咁好啫，唔係下下要打去櫃檯都咪話唔大壓力架。