講起 Google 地圖，大家可能都會諗起 Google 街景車，連警察做嘢想掩飾身份都要扮佢就知有幾深入民心啦！不過，自細讀書都有教，香港山多平地少，唔係度度都可以揸住街景車到達，咁世界上其他山旯旮（音：卡啦）嘅角落又點樣影低全景，製作成大家喺 Google 地圖上見到嘅 360 度街道景觀呢？就等 Google 街景計畫作業員 Raf 親自為大家解說啦。
[ot-video][/ot-video]
原來除咗大家熟悉嘅街景車，Google 街景「車隊」仲有好多款，包括街景背囊、街景手推車、街景雪地電單車同街景三輪車。香港目前會用街景車及街景手推車去拍攝大街及道路，甚至博物館內的展品；而山路、樓梯及窄巷等等，則會由專人背上街景背包去拍攝。
外表陽光嘅 Raf 正正就係專門負責揹住街景背包拍攝街景，香港唔少地方都都有留下 Raf 嘅腳毛，包括昂坪棧道、麥理浩徑第八段、中環美利道旋轉樓梯、石板街、沙田萬佛寺等等。街景背包重約 18kg，高120cm，由電池及 15 組 500 萬像素的鏡頭組成，由Android 手機控制，電池充電後可用約6至8小時。每次 Raf 都揹住重 18kg 嘅街景背包去影相，如果上山落山要行差不多三至四個鐘，睇佢即場示範行樓梯好似相當輕鬆，但其實都幾講求體能。
「街景背包會自動每 2.5 秒拍攝一次，所以我只要保持穩定步速就得，難度唔高。Google 方面會後期再執相，例如執走拼合唔到嘅人、車，再將相片串連成 7,500萬像素嘅 360 度全景相。」咁拍攝時又有冇咩特別難忘嘅經歷？「有試過喺山畀狗追囉，不過好彩有帶行山杖，可以趕走野狗，唔使好似拍戲咁揹住十幾公斤裝備跑。」
想好似 Raf 一樣咁有型揹住 Google 街景背包周圍影低城市好風光，又唔係冇可能嘅，攝影師同攝影公司可以向 Google 申請認證，成為推薦攝影師；公眾同非牟利機構亦可以按此申請借用街景背包，深入高山低谷去拍攝，不過首先……你要揹得起18kg嘅街景背包行上山囉！
