各位已經有個同居蜜友嘅男女，有冇試過想同另一半相好一下，奈何暗示極對方都冇乜反應，唔係掛住睇手機就係左推又搪，又唔好意思成日開口問，好似成隻餓狼咁。性治療師叫呢樣嘢做「慾望差異」，就係指雙方嘅性慾望唔同步，令到關係變得冷淡云云。為咗解決愈嚟愈多痴男怨女唔知點樣向對方表示想同佢相好，有人就設計咗一套叫「 LoveSync 」嘅小裝置出嚟，重放上 Kickstarter 上眾籌。
「 LoveSync 」嘅設計者喺 Kickstarter 網頁引述一個性治療師指 80% 情侶在過去一個月遇過慾望差異問題，又引述《時代雜誌》指每周相好至少一次嘅情侶比率，由 2000 年嘅 45% ，下降至 2016 年嘅 36% 。而呢款「 LoveSync 」就是為幫助情侶恥於表達慾望而設。
「 LoveSync 」裝置其實係兩個互相同步嘅電容式觸控掣，雙方各執一個。用法好簡單：其中一方如果想「好♡」就輕輕撳下自己個掣，對方個掣啲燈就會轉動一段時間。對方可以放置一會考慮一下，唔方便／冇性趣的話只要唔理嗰盞燈，過一陣就會停；如果想明確啲拒絕的話，就撳住個掣 4 秒鐘以上回覆；但係如果對方都想親親的話，就輕按一下回應，咁樣提出一方個掣啲燈都會團團轉，表示雙方「達成共識」，可以行動♡（至於期間會唔會出意外，就唔係粒掣可以幫到大家嘅嘢喇）！
設計者指咁樣靜雞雞去尋求共識，要求或者拒絕時雙方都冇咁尷尬。此外，個掣都咗啲心思設計，首先提出一方可以控制等待對方回覆嘅「共識窗口」時間長度，最短 15 分鐘，撳多一下就增至 1 個鐘頭，最多撳 5 下可以延長到 24 小時。另外， LoveSync 唔係用按鈕掣而係觸控掣，減少按掣聲令對方警覺。粒掣用綠色燈同加強手感，係希望燈光冇咁干擾之餘，即使閂咗燈都搵得到粒掣。外殼用 CNC 車裁出嚟，都算大方得體。
LoveSync 嘅眾聚剛剛開始，超級早鳥價 US$44 （約港幣 $345 ）一套，正價就要 US$57 （約港幣 $447 ）一套。
LoveSync Kickstarter 眾籌網站：按此