今次係「台遊系列」嘅第二篇,玩完 IG 印相,又係時候講吓啲親子嘢先!
仲記得舊年 12 月中,《50tips》有一期係講「親子樂遊台灣」嘅題目,入面介紹咗好多台灣親子嘅好去處,今次編者去高雄,當然都有搵呢啲地方去啦,而行程住嘅第一間酒店,就係台南嘅「Hotel Cozzi 和逸台南西門館」,同上次「蘭城晶英酒店」有啲似,都係有電動小跑車比小朋友揸嘅,不過 Hotel Cozzi 就唔係走廊當馬路,而係集中響 4 樓一個好大嘅室外平台度玩,小朋友可以排隊等揸車,兜完一個圈就到下一位。
有樣嘢幾得意,就係呢度有小朋友自己揸嘅電動小跑車,但竟然仲有啲係可以遙控嘅電動小跑車,呢啲遙控車係比年紀細啲未識轉彎同踩油門嘅小朋友坐嘅,坐咗上去後,阿爸阿媽就揸住個遙控器跟響後面操控架小跑車,等佢可以坐吓順風車兜吓風咁;唔單止有電動小跑車,呢度仲有號稱全台灣唯一嘅親子小火車可以坐,圍住外圈行又會捐山窿,大人仲可以陪小朋友一齊坐;如果唔啱玩車,呢度仲有沙池同噴水池玩,肯定小朋友樂而忘返呀!
唔好以為 Hotel Cozzi 淨係顧住有小朋友嘅 Family 喎,查實呢間酒店仲有個特色,就係有全台灣唯一嘅「XBOXONE 主題客房」,係呀!真係有部 XBOX ONE 遊戲機擺響房比你任打㗎!主題客房有兩層樓,全部用晒綠色牆,好易認!編者住咗兩晚普通房樓層,但見到有唔少後生仔女住 XBOX 樓層,一 Pair Pair 咁攞住啲 Game 出𨋢,又有得換 Game 打,真係打到天昏地暗唔使出房門口半步呀!最啱幾個 Fd 一齊閉門練功打餐飽,唔爆機唔退房!
其實呢間酒店並唔係新開,睇返啲介紹開業咗兩年有多,但編者覺得確係幾有諗頭,唔止啱小朋友玩,連鍾意打機嘅年輕人都啱,而且酒店嘅整體服務、地點周邊、設施配套等都好唔錯,嗱嗱嗱……唔係賣廣告㗎!唔信嘅就自己去試吓啦!
© 2020 Plug Media Services Limited. All Rights Reserved. [2]