呢期星戰由地球紅到上太空再返落地球，無人不識無人不曉無人不講，原力爆晒錶。作為一部科幻電影，可以橫跨三十多年拍到第七集依然紅到發紫，絕對空前成功；但入面嘅橋段實際上又係咪可行呢？美國化學協會嘅科學家就認真去研究，仲拍埋片解釋過你聽。
首先佢哋就研究死星嘅激光。死星作為帝國嘅終極武器，攻擊力當然好強大啦，可以摧毀成個 Alderaan 星球。現今地球最強嘅 Laser 激光係由日本基地所產生嘅 2 Petawatt 激光，科學家就話，Alderaan 有地球一半大，應該要再強 100 萬倍嘅激光，先足以摧毀成個星球。之但係，要產生咁強力嘅激光，同時亦會有化學作用，產生大量熱能，喺發射激光前已足以溶掉整個死星。再者，電影入面形容發射激光時，光線會聚焦成一束－但無啦啦冇折射又點會聚埋一齊？零分重作。
至於光劍，科學家就話係用 Plasma 而造，因為 Plasma 中嘅離子為活躍離子，可以透過電磁力去控制形狀，雖然當中都會產生熱能，但聽落似乎合理。科學家亦提到有學者認為光劍可能應用伽馬射線（Gamma Ray），亦有說是光子（Photons）。而 Force Field 就簡單啦，咪一舊雲狀嘅Plasma囉。雖之話家陣嘅 Plasma 技術就未整到光劍，但凡事唔係絕對嘅，希望在彭丹丫嘛～