今年嘅 5 月真係好難過,編者講緊係熱得好難過呀!同埋仲要等多兩個禮拜至有俄羅斯嘅世界盃睇,你哋話係咪好難過喇!
講到世界盃,要到 6 月 14 號至開波,今年世界盃由 Now TV 獨家直播,而今次 Now TV 搞嘅世界盃就有好多嘅第一次,首先好多人都好想睇到 4K 世界盃,只要用 Now One 機頂盒就睇到 4K 超高清畫質嘅球賽喇;跟住上個禮拜就出咗個 Now E 嘅 OTT 平台,包括有 Android TV 嘅 OTT 盒子同埋 App,比一啲無機頂盒或者用唔到機頂盒嘅用戶,只要用呢個 OTT盒子一樣睇到世界盃,配合埋個 App 仲可以隨街睇𠻹!另外,仲有個「一日通行證」,可以用 App 揀邊日淨睇自己愛隊嘅比賽,夠晒彈性。
![呢個就係全港唯一官方認可嘅世界盃 OTT 盒子—— Now E 喇!](https://www.pcmarket.com.hk/wp-content/uploads/2018/06/1295-p01-710x533.jpg)
今年 Now TV 為咗世界盃,可以話係用盡所有生活上嘅科技,務求全民都可以盡情享受世界盃嘅熱情。而個 OTT 盒子除咗可以睇世界盃,仲有好多其他用途,只要裝 Apps 就可擴充功能,世界盃下個禮拜開波,係時候做定準備,記得睇今期內文嘅講解。
講開世界盃,之前響美國嘅 Best Buy 入面,見到有個世界盃嘅攤位,好奇之下睇吓係乜啦?原來係 23andMe 嘅基因檢測工具,23andMe 係乜?首先講講佢個名先,「23」嘅意思就係人類嘅 23 對染色體,咁同你有乜關係呢?查實佢哋推出嘅服務就係透過採集用戶嘅唾液,檢測後得出相關嘅健康報告,從而得知自己得到某啲疾病嘅機率,以便及早作出預防或對應行動。
![響美國 Best Buy 見到呢個攤位,好自然咁比佢吸引咗,原來係 23andMe 嘅基因檢測服務。](https://www.pcmarket.com.hk/wp-content/uploads/2018/06/1295-p02-320x569.jpg)
所以 23andMe 就借助世界盃做吓宣傳,以「ROOT FOR YOUR ROOTS. Connect with the team that’s in your DNA.」作為口號,雖然好明顯係摱車邊,但都 Draw 到編者嘅 Attention,而個檢測套裝原價要 US$99,家陣就只要 US$69,平咗成三份一,其實 online 都買到,但就要原價喇!
![檢測套裝主要有支收集唾液嘅試管、防生物危害袋,做法係將有唾液嘅試管放入防生物危害袋,再寄返 23andMe 嘅實驗室,之後等報告就得喇!](https://www.pcmarket.com.hk/wp-content/uploads/2018/06/1295-p03-710x549.png)